Valamuli 13 - Tshwa Bible

Samsoni.

¹ A vanana va ka Israeli va lo engeta kambe va maha kubiha mahlweni ka Jehova. Jehova i lo va nyikela mandleni ya vaFilistia 40 wa malembe.

² Ku wa hi kona a munhu wo kari le Zora, wa lixaka la ka Dani, a vito a nga hi Manoa. A sati wakwe i wa hi ngonwa.

³ A ngelosi ya Jehova yi lo woneka ka wasati loye, yiku: Cuwuka, wena u ngonwa. Kanilezi u ta xura nyimba, u pswala nisanyana.

⁴ Kanilezi ti wonele makunu. U nga hanwi vinya, ni byala; kambe u ngagi lezi zi nga hlazekangiko, Mitse. 6:2; 1 Sam. 1:11; Lu. 1:15

⁵ Hakuva u ta xura nyimba, u pswala nisanyana. Ni likari li nga dzuki li khumba hloko yakwe, hakuva a nwanana loye i ta maha muNazirita wa Nungungulu kusukela rumbyini ga nyine wakwe. Hi yena a ta nga sangula ku hlanguta va ka Israeli mandleni ya vaFilistia.

⁶ Zonake a wasati i lo ya byela a nuna wakwe, aku: Ku tile ka mina a munhu wa Nungungulu. A kutshisa kakwe i fanana ni ngelosi ya Nungungulu. A nzi mu wutisangi lomu a tako ha kona, na yenawu a nga nzi byelangi vito gakwe.

⁷ Kanilezi yena i te ngalo ka mina: U ta xura nyimba, u pswala nisanyana. Makunu u nganwi vinya, hambu byala. Ni kambe u ngagi a zilo zi nga hlazekangiko, hakuva a nwanana i ta maha muNazirita wa Nungungulu kusukela rumbyini ga nyine wakwe, kala afa.

⁸ Makunu Manoa i lo kombela ka Jehova, aku: Hosi yanga, a munhu wa Nungungulu, loyi wena u mu rumileko, a engete kambe ata ka hina a ta hi gonzisa lezi hi faneleko ku zi maha hi nwanana loyi a ta nga pswalwa.

⁹ Nungungulu i lo ingisa a gezu ga Manoa. A ngelosi ya Nungungulu yi lo engeta yita kambe ka wasati na a tshamile le masinwini; kanilezi a nuna wakwe Manoa i wa nga hi kona.

¹⁰ Zonake a wasati i lo tsutsuma a ya tivisa a nuna wakwe, aku: A munhu loyi a nga wa tile ka mina legiya siku, i wonekile kambe ka mina.

¹¹ Manoa i lo suka a lanza sati wakwe, a ta chikela ka munhu wa kona, aku: Hi wena: loyi u nga wulawula ka loyi wasati ke? Yena aku: Hi mina.

¹² Manoa aku: Loku lezi u zi wulileko zi maheka, hi yihi milayo ni mitiro leyi yi ta nga fumela a nwanana wa kona?

¹³ A ngelosi ya Jehova yiku ka Manoa: A wasati a ti tsone zontlhe lezi nzi nga zi wula.

¹⁴ A ngagi a xilo xi humako hi ka vina, a nganwi vinya hambu byala; kambe a ngagi a xilo xi nga hlazekangiko. A hlayise zontlhe lezi nzi mu leleteleko zona.

¹⁵ Manoa aku ka ngelosi ya Jehova: Hi vumele hi ku hlweta hi ku ku longisela ximhutana.

¹⁶ A ngelosi ya Jehova yiku ka Manoa: Hambu loku u nzi hlweta, cima nzi nga taga a kuga ka wena. Kanilezi loku u maha a muphahlo wa kuhiswa, wu nyikele ka Jehova. Hakuva Manoa i wa nga zi tivi lezaku i ngelosi ya Jehova.

¹⁷ Manoa i te ngalo ka ngelosi ya Jehova: Hi wena mani vito ga wena, kasi ha fela ku ku dzunza loku zi maheka lezi u wulileko. Gen. 32:29

¹⁸ A ngelosi ya Jehova yi te ngalo ka yena: Hikuyini u wutisako a vito ga mina ke? I vito gi hlamalisako!

¹⁹ Zonake Manoa i lo teka a mhutana ni munyikelo wa mapa a nyikela ka Jehova laha ribyeni. A ngelosi ya Jehova yi lo maha zihlamaliso, Manoa ni sati na va kari va zi wona.

²⁰ Hakuva ku te laha a nzilo wa alati wu nga kari wu ngengemela, yonawu ngelosi ya Jehova yi lo tlakukela hehla hi lomu langavini ga nzilo wa alati, Manoa ni sati wakwe na kari va zi wona. Va lowa lahasi hi tinghohe tabye.

²¹ A ngelosi ya Jehova a ya ha engetangi yi woneka kambe ka Manoa ni sati wakwe. Zonake Manoa i lo zi tiva lezaku i ngelosi ya Jehova.

²² Manoa aku ka sati wakwe: Hizinene hi tafa, hakuva hi wonile Nungungulu. Ekso. 33:20; Deut. 5:26

²³ Kanilezi a sati wakwe aku ka yena: Loku Jehova a wa xuvile ku hi daya, ngha a nga amukelangi a muphahlo wa hina wa kuhiswa ni munyikelo wa kona, kambe ngha a nga hi kombisangi zontlhe lezi zilo: hambu nyamutlha ngha a nga hi tivisangi timhaka ta kunghahi.

²⁴ A wasati i lo pswala nisanyana, a mu chula vito ga Samsoni. A xihlangana lexo xi lo kula, Jehova a xi katekisa.

²⁵ A Moya wa Jehova wu lo sangula ku mu kucetela na a hi le Mahane-Dani, xikari ka Zora ni Extaoli.