Titusi 3 - Tshwa Bible

Longani ku maha mitiro yontlhe yo saseka.

¹ Va alakanyise lezaku va ti koramisa ka tihosi, hi ka vafumeli, va ingisa ni ku longa ku maha mitiro yontlhe yo saseka, Maheb. 13:21

² va nga lumbeti munhu, va nga holovi, va hi va nene, va kombisa kuolova ka vanhu vontlhe. Ekso. 20:16; Efe. 4:31

³ Hakuva kale na hinawu hi wa hi zipumbu, hi nga ingisi, na hi pengile, hi hi tikhumbi ta kunavela ko biha ni kutitsakisa kunyingi; hi lo hanya hi matshoho ni makangwa, hi nyenyiwa, hi vengana.

⁴ Kanilezi laha ku nga woneka a wunene ga Nungungulu a Muhanyisi wa hina, ni liranzo lakwe a ka vanhu,

⁵ i lo hi hanyisa, na ku nga hi mitiro ya kululama, leyi hina wutsumbu hi yi mahileko, kanilezi hi wuxinji gakwe, ni kuhlaziwa ka kupswalwa luswa, ni ku mahiwa luswa hi Moya wa ku Basa, Joh. 3:3, 5; Rom. 3:20; Gal. 2:16; 1 Ped. 3:21

⁶ lowu a nga wu chela hehla ka hina hi matsenya, ha Jesu Kristu a Muhanyisi wa hina; Ezek. 36:25; Joeli 2:28; Joh. 1:16

⁷ kasi na hi hlayelwe kululama hi tipswalo takwe, hi fela kuva ni kutsumba a ku mahiwa zigatshomba za wutomi ga pinzukelwa.

⁸ Gi tsumbekile a gezu legi; nza ranza lezaku u tiyisa hi ntamu a timhaka leti, lezaku lava va kholwako va pinyamela a mitiro yo saseka. Lezi zilo zi nene, za vuna ka vanhu.

⁹ Kanilezi nyenya timhaka ta wupumbu, ni mabhuku ya ziloso, ni kukanetisana ni kulwa hi kota ya nayo, hakuva a zi na bhinzu, a zi vuni nchumu. 1 Tim. 1:4; 2 Tim. 2:23

¹⁰ A munhu loyi a gonzisako lezi zi hambanako ni zinene, u ta tsawukana naye anzhako ka kuva na u mu lulekile kanwe kutani kumbiri; Mat. 18:17; 2 Kor. 13:2; 2 Tim. 3:5; 2 Joh. 10

¹¹ na u tiva lezaku a wa kunghaho i bihisilwe, wa onha, i ti konile ha yece. Miti. 13:46

¹² Laha nzi ta nga ruma Artemasi ka wena, kutani Tikikusi, hatlisa uta ka mina le Nikopolisi; hakuva nzi xuvile a ku tshama kona wuxika. Miti. 20:4; 2 Tim. 4:12

¹³ Hlomisa Zenasi, a mugonzisi wa nayo, na Apolosi a pfhumbeni gabye, lezaku va nga vumali nchumu. Miti. 18:24

¹⁴ A vanhu va hina ngha va gonza ku tira mitiro yo saseka, kasi va fela ku vuna laha ku vumalekako, lezaku va ngavi lava va nga hava mihanzu. Fil. 1:11; Kol. 1:10; 2 Ped. 1:8

¹⁵ Vontlhe lava va nga na mina va ku rungula. Rungula lava va hi ranzako kukholweni. A tipswalo a tive na nwina nwentlhe.