Titusi 1 - Tshwa Bible

¹ Paule, a nanza ga Nungungulu, tlhelo mupostoli wa Jesu Kristu, a rumelweko hi kota ya kukholwa ka vahlawulilweko va Nungungulu, ni kutiva kabye a zinene lezi zi xungeteneko ni ku khozela Nungungulu, 1 Tim. 6:3; 2 Tim. 2:25

² hi ku tsumba a wutomi ga pinzukelwa, legi Nungungulu loyi a nga hembiko a nga tsumbisa hi kaleloko ka matiko; 2 Tim. 1:9

³ kanilezi hi xikhati xakwe i lo wonekelisa a mhaka yakwe hi mahungu lawa nzi nga nyikiwa wona hi kulaya ka Nungungulu, a Muhanyisi wa hina. 1 Tes. 2:4; 2 Tim. 1:10

⁴ Mina Paule nza rungula Titusi, a nwananga hizinene a kukholweni loku hi nga nako hi wumbiri ga hina, nziku: A tipswalo ni kurula a zive na wena, na zi huma ka Nungungulu Dadani na Kristu Jesu a Muhanyisi wa hina. 2 Kor. 2:13; Gal. 2:3

A mahanyela ya varisi ni masingalakati.

⁵ Nzi ku siyile le Kreta lezaku u fela ku lulamisa a timhaka leti ti seleko, u yimisa masingalakati mitini yontlhe, kota lezi nzi nga ku laya, Miti. 14:23; 1 Kor. 11:34

⁶ loku u kuma munhu loyi a nga solekiko, a nga nuna wa sati munwe, na a hi ni vana lava va kholwako, lava va nga soliwiko hi kota ya vilinganya ni kungaingisi.

⁷ Hakuva a murisi ngha a nga soleki, kota lezi a nga nekwa ya Nungungulu; na a nga hi na xikanikani, na a nga hi na xizangazangani, a nga ti nyikeliko kunweni ka byala, na a nga hi mubi, na a nga naveli bhinzu go biha; Levi 10:9; Mat. 24:45

⁸ kanilezi a va munhu a rurelako vapfhumba, a muranzi wa wunene, loyi a tlharihileko, loyi a lulamileko, a basileko, wa kutikhoma;

⁹ loyi a namarelako ka mhaka yi tsumbekako ya gonzo, kasi a fela ku zi kota ku luleka hi gonzo leyi yi hanyisako, ni ku kada lava va kanetako. 1 Tim. 1:10

A vagonzisi va mawunwa.

¹⁰ Hakuva va kona vanyingi lava va nga ingisiko, a vabyabyatsi ni vakanganyisi, nguvunguvu lava va zitshiva,. Miti. 15:1

¹¹ lava va faneleko ku valiwa milomu, hakuva va hahlula mingango yi mbhela, hi ku gonzisa lezi zi nga faneliko, kasi ku kuma bhinzu go biha. Mat. 23:14

¹² A munwe wa vona, a nga muprofeti wabye, i ngalo: A va le Kreta mbahembi xikhati xontlhe, zihari zo biha, a zimiti zi lolohako. Miti. 17:28

¹³ A wukustumunyu legi gi nene. Hi kota ya lezo va kawuke hi ntamu, kasi vava ni wutomi kukholweni,

¹⁴ na va nga cheli kota hi mitsheketo ya vaJuda, ni zileletelo za vanhu lava va hambukileko zineneni. Mat. 15:9

¹⁵ Zontlhe zi basile ka lava va basileko; kanilezi a ku na xilo xi basileko ka lava va zivi ni va nga kholwiko; a kupima kabye ni livalo labye zi nyenyezile. Lu. 11:39

¹⁶ Va wula lezaku va mu tiva Nungungulu, kanilezi va mu kaneta hi mitiro yabye; mbanhu va manyala, ni va nga ingisiko, a va vuni nchumu mitirweni yontlhe yo saseka. Ezek. 33:31; Rom. 1:28