Tisimu 98 - Tshwa Bible

Yimbelelani ka Jehova.

Lisimu.

¹ Yimbelelani ka Jehova a lisimu liswa, Hakuva i mahile zirewukiso; A canja gakwe ga xinene, ni woko gakwe go basa zi mu hlulele.

² Jehova i kombisile a kuhanyisa kakwe, I wonekelisile a kululama kakwe ka vamatiko. Lu. 2:30

³ I alakanyile a wuxinji gakwe ni kutsumbeka kakwe ka yindlu ya Israeli, A magemetamusi ya misava ma wonile a kuhanyisa ka Nungungulu wa hina. Lu. 1:54

⁴ Banani huwa ga kutsaka ka Jehova, nwentlhe matiko, Hlalelani hi litsako, mu yimbelela.

⁵ Yimbelelani ka Jehova hi xitende, Hi xitende ni tisimu ta kudumisa.

⁶ Hi tinanga ni guwa ga makhombela, Hlalelani mahlweni ka Jehova, a Hosi.

⁷ A bimbi ngha gi dzinza, ni lezi zi nga ka gona, A tiko ni lava va tshamako ka gona.

⁸ A micongo a yi phakatele mandla, A zitsunga a zi yimbelela zinwe hi litsako,

⁹ Mahlweni ka Jehova, hakuva wata a ku ta lamula misava; I ta lamula tiko hi nongameto, Ni matiko hi kululama kakwe. Miti. 17:31