Tisimu 97 - Tshwa Bible

Tsakani Hosini.

¹ Jehova wa fuma; a misava ngha yi nengela, Ni zihlale leʼzinyingi a zi tsake. Isa. 60:9; Zak. 9:9

² A marefu ni munyama zi mu ranzele, A kululama ni kulamula ziseketelo za xitshamu xakwe xa wuhosi. Ekso. 19:16

³ A nzilo wu ranga mahlweni kakwe, Wu hisa valala vakwe wontihe matlhelo.

⁴ A kuhatima kakwe ku woninga misava, A misava ya ku wona, yi rurumela.

⁵ A zitsunga zi nyeka mahlweni ka Jehova kotisa sera, A mahlweni ka Hosi ya misava yontlhe.

⁶ A matilo ma tlhatlhambutela a kululama kakwe, Ni matiko wontihe ma wona a wukulu gakwe.

⁷ Ngha va wiswa tingana lava va khozelako zifananiso, Lava va ti kulisako hi vanungungulu va mawunwa. Mu khizameleni nwina vanungungulu nwentlhe! Ekso. 20:3; Maheb. 1:6

⁸ Zioni i lo zizwa a tsaka, A vanhwana va Juda va nengela, Hi kota ya kulamula ka wena, Jehova.

⁹ Hakuva wena Jehova u loyi a Tlakukileko nguvu misaveni yontlhe, U tlakukile hehla ka vanungungulu vontlhe.

¹⁰ Nwina lava mu ranzako Jehova, vengani kubiha; Wa lonzowota a mihefemulo ya vabasileko vakwe, Wa va ponisa mandleni ya vakubiha. Am. 5:14; Joh. 10:28; Rom. 12:9

¹¹ A kuwonekela ku xwanyelwe lava va kululama, Ni kutsaka ka lava va lulamileko timbilu.

¹² Tsakelani Jehova, nwina va kululama, Mu dumisa vito gakwe go basa.