Tisimu 96 - Tshwa Bible

A lisimu liswa la misava yontlhe.

¹ Yimbelelani a lisimu liswa ka Jehova, Yimbelelani ka Jehova yontlhe misava. 1 Kro. 16:23; Isa. 42:10; Kuv. 5:9

² Yimbelelani ka Jehova, mu khesa vito gakwe, Kanelani a kuhanyisa kakwe siku ni siku. Lu. 2:30

³ Tlhatlhambutelani a wudzunzo gakwe xikari ka matiko, Ni mitiro yakwe yi hlamalisako xikari ka vanhu vontlhe.

⁴ Hakuva Jehova ngwa hombe, i fanelwe hi ku dumiswa, Wa chaveka ku hunza vanungungulu vontlhe. Deut. 10:17

⁵ Hakuva vontlhe vanungungulu va matiko zifananiso ntsena, Kasi Jehova i mahile matilo. Isa. 41:23; 1 Kor. 8:4

⁶ A wudzunzo ni wukulu gi le mahlweni ka yena, A ntamu ni wumbhuri zi lomu ndlwini yakwe ya kubasa.

⁷ Nwina tixaka ta vanhu, hlayelani Jehova, Hlayelani Jehova a wudzunzo ni ntamu.

⁸ Hlayelani Jehova a wudzunzo legi gi faneleko a vito gakwe, Nehani miphahlelo, mu enghena ziluvelweni zakwe.

⁹ Khozelani Jehova na mu ambele wubaswa, Mu rurumela mahlweni kakwe nwina nwentlhe va misava.

¹⁰ Kanelani xikari ka matiko, muku: Jehova wa fuma; Hikwalaho misava yi tiyile, a yi na ku tsekatsekiswa, I ta lamula a matiko hi nongameto.

¹¹ Ngha matilo ma tsaka, ni misava yi nengela, Ngha bimbi gi dzinza ni zontlhe zi nga ka gona. Isa. 44:23; Rom. 8:21

¹² Ngha mikova yi nengela ni zontlhe zi nga ka yona, Zonake a tisinya tontlhe ta khwati ti ta yimbelela hi litsako

¹³ Mahlweni ka Jehova hakuva wata, Hakuva i tela ku ta lamula misava, I ta lamula tiko hi nongameto, Ni matiko hi kutsumbeka kakwe. Miti. 17:31