Tisimu 95 - Tshwa Bible

Jehova, Mumahi wa hina.

¹ Tanani, a hi yimbeleleni ka Jehova, Hi khanela a ribye ga kuhanyiswa ka hina. Deut. 32:4

² A hi yeni mahlweni kakwe zinwe ni kubonga, Hi mu tlhavela zizimba za kutsaka.

³ Hakuva Jehova i Nungungulu wa hombe; I Hosi ya hombe hehla ka vanungungulu vontlhe,

⁴ A kueta ka misava ku le mandleni yakwe, Ni za le hehla za zitsunga zi lumba yena.

⁵ A bimbi gakwe, i lo gi maha; Ni mandla yakwe ma lo maha muhanza wa kuwoma.

⁶ Tanani, a hi khizameni hi korama, A hi khizameleni Jehova, a mumahi wa hina. Isa. 43:7; Efe. 2:10

⁷ Hakuva yena i Nungungulu wa hina, Hina hi tiko ga wuriselo gakwe, Hi tiyivu ti hlayiswako hi yena. E, loku mu wa ta vumela nyamutlha ku ingisa gezu gakwe!

⁸ Mu nga nonohisi a timbilu ta nwina, kukotisa le Meriba, Khwatsi hi siku ga Massah le xiwuleni, Ekso. 17:7; Maheb. 3:7; 4:7

⁹ Laha a vadadani va nwina va nga nzi ringa, Va lo nzi ringa, hambu lezi va wonileko mitiro ya mina. 1 Kor. 10:9

¹⁰ Mune wa makume ya malembe nzi lo tsanwa hi xizukulwana lexo, Nziku: Mbanhu vo lahleka timbilwini tabye, A va tivangi a tindlela ta mina. Ekso. 32:9; Deut. 32:5, 6, 28

¹¹ Laha ka kuva nzi hlambanya zangeni ya mina, Lezaku va nga ta enghena kuhumuleni ka mina. Mitse. 14:22; Maheb. 3:18; 4:3