Tisimu 92 - Tshwa Bible

A kuhumula ka vana va Nungungulu.

Lisimu la Siku ga sabado.

¹ Zi sasekile ku khanela Jehova, Ni ku dumisa a vito ga wena, loyi u Hunzeleleko Kutlakuka;

² A ku tlhatlhambutela a wunene ga wena laha mixweni, Ni kutsumbeka ka wena laha wusikwini,

³ Hi xitende xa khume ga tingoti ni magubhu, Ni pfumawulo wa xitende.

⁴ Hakuva wena Jehova wa nzi tsakisa hi mitiro ya wena, Nzi ta huwelela hi litsako hi kota ya mitiro ya mandla ya wena.

⁵ Jehova, yi kulisile kuyini a mitiro ya wena! Ni maalakanyo ya wena ma etile nguvu. Rom. 11:33

⁶ A xipumbu a xi zi tivi, Hambu wa lihlanyi a nga pimi a zakunghahi.

⁷ Loku a vakubiha va hluka khwatsi i byanyi, Ni loku a vahambunyeti va vuvuma, Zi mahiwa lezaku va lobyiswa kala kupinzuka.

⁸ Kanilezi wena Jehova, U tlakukile kala kupinzuka.

⁹ Languta, valala va wena, Jehova, Languta, a valala va wena va lova. Vontlhe vahambunyeti va ta hangalaswa.

¹⁰ Kanilezi u ta tlakusa a limhonzo la mina kukotisa la nyari, Nzi totiwa hi mafura maswa.

¹¹ A mahlo ya mina ma tsaka hi ku wona a valala va mina, Ni tindleve ta mina ti tazwa a vakubiha lava va nzi vukelako.

¹² A wakululama i ta hluka kukotisa a sinya ya cinzu, A kula kukotisa a sedare ya Lebanoni. Mav. 11:28; Jer. 17:8; Hos. 14:6

¹³ Lava va byalilweko ndlwini ya Jehova, Va ta anza lomu hubyeni ya Nungungulu wa hina.

¹⁴ Va ta pswala mihanzu ni lomu wukhosaneni gabye, Va ta tala ni nhome va maha vaswa;

¹⁵ Kasi ku kombisa lezaku Jehova i lulamile, Hi yena ribye ga mina, cima a nga na kubiha. Deut. 32:4; Zef. 3:5