Tisimu 86 - Tshwa Bible

Nzi muxaniseki ni muvumali.

Mukombelo wa Davida.

¹ Jehova, koramisa a ndleve ya wena u nzi hlamula, Hakuva nzi muxaniseki ni muvumali.

² Lonzowota a muhefemulo wa mina, hakuva nzi muranziwa wa wena, Nungungulu wa mina, hanyisa a nanza ga wena legi gi ku tsumbako.

³ Hosi, nzi zwele wuxinji, Hakuva nziba huwa ka wena gontlhe siku.

⁴ Tsakisa a muhefemulo wa nanza ga wena, Hakuva nza tlakusa a muhefemulo ka wena, Hosi.

⁵ Hakuva wena Hosi, u nene, wa tsetselela, U maha wuxinji kanyingi ka lava va ku khongelako. Joeli 2:13; Jona 4:2

⁶ Jehova, kangatela ndleve ka mukombelo wa mina, U ingisa a gezu ga mikombelo ya mina.

⁷ Nzi ta kombela ka wena xikhatini xa kuxaniseka ka mina, Hakuva wena u ta nzi hlamula.

⁸ Xikari ka vanungungulu a nga kona a fananako na wena, Hosi, A yi kona mitiro yi fananako ni ya wena. Ekso. 15:11; Deut. 3:24

⁹ A matiko wontihe lawa u ma mahileko ma tata, ma ku khizamela, Hosi, Ma kulisa vito ga wena. Zef. 2:11; Zak. 14:9

¹⁰ Hakuva wena u wa hombe, u maha zirewukiso; Wena wece u Nungungulu.

¹¹ Jehova, nzi gonzise a ndlela ya wena, Nzi ta famba zineneni za wena; Maha mbilu ya mina yi chava vito ga wena.

¹² Hosi Nungungulu wa mina, nzi ta ku dumisa hi mbilu ya mina yontlhe, Nzi kulisa a vito ga wena kala kupinzuka.

¹³ Hakuva a wunene ga wena ka mina ga hombe, U ponisile a muhefemulo wa mina kueteni ka Xeole.

¹⁴ Nungungulu, a vamatshanza va nzi vukela, A xidlemo xa zigevenga xi hlota wutomi ga mina; A va rangisi wena maalakanyweni yabye.

¹⁵ Kanilezi wena Hosi, u Nungungulu loyi a hawukelako, u hi ni tipswalo; Wa timisela, u tele hi wuxinji ni kutsumbeka. Ekso. 34:6; Neh. 9:17

¹⁶ Nzi hunzulukela, u nzi mahela wuxinji; Nyika a ntamu wa wena ka nanza ga wena, U ponisa a nʼwana wa nanza ga wena ga xisati.

¹⁷ Nzi kombise a xikombiso xa thomo ga wena, Kasi lava va nzi vengako va ta xi wona vawa tingana, Hakuva wena Jehova, u lo nzi vuna, ni ku nzi chavelela.