Tisimu 84 - Tshwa Bible

A tihubye ta Jehova.

Ka muchuli wa Gitite. Lisimu la vana va Kora.

¹ Ti ranzekisa kuyini a tiyindlu ta wena, Jehova wa tiyimpi!

² A muhefemulo wa mina wa xuva, ina, wa navela a ziluvelo za Jehova; A mbilu ya mina ni miri wa mina za rilela hi kutsaka ka Nungungulu a hanyako.

³ Hakuva a manjingiri i ti kumele a yindlu, Ni mbewulwani yi ni xisaka lomu yi nga vekako kona mavinyani ya yona, Ma nga wona maalati ya wena, Jehova wa tiyimpi, Hosi ya mina ni Nungungulu wa mina.

⁴ Va katekile vona lavo va tshamileko ndlwini ya wena, Vona va simamisa va bonga wena. (Sela.)

⁵ Va katekile a vanhu lava a ntamu wabye wu nga ka wena, Lava va xuvako a tindlela ta wena.

⁶ Loku va kari va tsemakanya a nzhelelo wa Kurila, Va wu maha a wutshamu ga tihlowo; A vula ya kuranga yi wu fenengeta hi zikatekiso.

⁷ A ntamu wabye wo enzelekelana, Vona vontlhe va woneka mahlweni ka Nungungulu le Zioni.

⁸ Jehova, Nungungulu wa tiyimpi, ingisa kukhongela ka mina, Kangatela a ndleve, Nungungulu wa Jakobe. (Sela.)

⁹ Nungungulu, xitlhangu xa hina, languta, U cuwuka a nghohe ya a totilweko wa wena.

¹⁰ Hakuva a ku tshama siku ginwe ndlwini ya wena Ku sasekile ku hunza ku tshama khume ga mazana lahandle. Nza ranza a kuva nzi hi muhlayisi wa livati lomu ndlwini ya Nungungulu wa mina, Ku hunza a ku tshama matendeni ya vakubiha.

¹¹ Hakuva Jehova Nungungulu i gambo ni xitlhangu; Jehova i ta nyika wuxinji ni wudzunzo, A nga ta va tsona a xilo xo saseka lava va fambako kululameni. Tis. 3:4; 23:1; Isa. 60:19

¹² Jehova wa tiyimpi, I katekile a munhu loyi a tsumbako ka wena.