Tisimu 81 - Tshwa Bible

Vanhu va mina, Ingisa.

Ka muchuli wa Gitite. Lisimu la Asafa.

¹ Yimbelelani hi litsako ka Nungungulu, a ntamu wa hina, Mu maha a guwa ga kutsaka ka Nungungulu wa Jakobe.

² Tlhavani xizimba, muba tingomana, Ni zitende zo vuma khwatsi, zinwe ni magubhu.

³ Kuwonekeni ka hweti banani mpunzu, Wu biwa ni xikhatini xa babani, Hi siku ga mubuzo wa hina. Ekso. 12:1; Levi 23:5; Deut. 16:1

⁴ Hakuva xiyimiso xikari ka Israeli, A nayo wa Nungungulu wa Jakobe.

⁵ A wu veka ka Josefa wuva wumboni, Laha na a hlasela tiko ga Gipite. Nzi lozwa a lirimi nzi nga li tiviko:

⁶ Nzi susile a nzhwalo katleni gakwe, Ni mandla yakwe ma ruliwa xirunzwini. Ekso. 1:14; 6:6

⁷ U lo nzi khongela na u hi zikaratweni, nzi ku ponisa, Nzi ku hlamule na nzi hi xihundleni xa kudzinza. Nzi ku ringa le matini ya Meriba. (Sela.) Ekso. 17:1; Mitse. 20:13

⁸ Ingisa, tiko ga mina, nzi ku luleka; Israeli, loku ku wo khwatsi u wa nzi ingisa!

⁹ Ku nga tava ni munwani nungungulu ka wena, U nga khizameli a nungungulu wamatiko. Ekso. 20:2

¹⁰ Nzi Jehova, Nungungulu wa wena, Loyi nzi nga ku humesa tikweni ga Gipite; Ahlamisa a nomu wa wena, nzi ta wu tata.

¹¹ Kanilezi a vanhu va mina a va ingisangi a gezu ga mina, Na Israeli i wa nga nzi lavi.

¹² Hikwalaho nzi lo va tsika kunonoheni ka timbilu tabye, Va lo famba hi makungo yabye. Ezek. 20:25; Miti. 14:16; Rom. 1:24

¹³ Loku ku wo khwatsi a tiko ga mina ga nzi ingisa, Loku ku wova Israeli i wa famba hi tindlela ta mina!

¹⁴ Ngha nzi hatlisa ku khozisa valala vabye, Nzi wa ta hunzula a canja ga mina valaleni vabye.

¹⁵ Zonake lava va vengako Jehova va wa ta ti tsongahata mahlweni kakwe, Ni xikhati xa vanhu vakwe xi wa tava xa kala kupinzuka.

¹⁶ Nzi wa ta va phamela mavele ma nene, Nzi ku xurisa hi wulombe ga lomu ribyeni. Deut. 32:13