Tisimu 80 - Tshwa Bible

A Murisi wa Israeli.

Ka muchuli wa Xuxane-edute. Lisimu la Asafa.

¹ Ingisa, wena Murisi wa Israeli, Wena loyi u rangelako Josefa khwatsi hi ntlhambi; Wena loyi u tshamako xikari ka makerubima Huma u hatima. Isa. 37:16; Ezek. 34:12; Joh. 10:11

² Vuxa a ntamu wa wena, U rangela Efraime na Benjamini na Manasse, Zonake ngone u ta hi hanyisa.

³ Nungungulu hi akise kambe, Maha a nghohe ya wena yi woninga, kasi hi hanyiswa.

⁴ Jehova, Nungungulu wa tiyimpi, Ku ta kala kuva rini na wa ha zangarela a mikombelo ya tiko ga wena?

⁵ Wena u phamele a wuswa ga mihloti, U va nwisa mihloti hi lipimo la hombe.

⁶ A vaakelwane va hina va bangelana ba hina, Ni valala va hina va hi tseketsela.

⁷ Nungungulu wa tiyimpi, hi akise kambe, Maha a nghohe ya wena yi woninga, kasi hi hanyiswa.

⁸ Wena u simule a sinya ya vina le Gipite, U hlongola vamatiko, u yi sima. Gen. 49:22; Isa. 5:1; 27:2

⁹ U lo yi longisela a misava, Yi zima mitsu, yi nava ni ku tata gontlhe tiko.

¹⁰ A zitsunga zi lo khubunyetwa hi nzhuti wa yona, Ni maravi ya yona me khwatsi tisedari ta Nungungulu.

¹¹ A maravi ya yona ma nava ma chikela bimbini, Ni mahluke ya yona ma chikela Congweni. Gen. 15:18; Deut. 11:24; 1 Tih. 4:21, 24

¹² Hikuyini u hahlulako a lihlavu la yona, Lezaku yi khayiwa hi vontlhe vahunzi ke?

¹³ A makhumba-khwati ma xura ha yona, Ni zihari za khwati za yiga.

¹⁴ Wuya, Nungungulu wa tiyimpi, Cuwuka lahasi na u hi tilweni; Langutela ni ku hlayisa a sinya leyi ya vina.

¹⁵ Yimela a sinya leyi ya vina leyi yi nga byaliwa hi canja ga wena ga xinene, Ni nʼwana loyi u nga ti wundlela. Ekso. 4:22

¹⁶ Yi swile hi nzilo, yi tsemilwe; Va lova hi kukawukwa hi nghohe ya wena.

¹⁷ Vikela munhu wa canja ga wena ga xinene, A nʼwana wa munhu loyi wena u nga ti wundlela yena.

¹⁸ Hikwalaho hi nga ta ku fularela; Hi hanyise, kasi hi fela ku khongela hi vito ga wena.

¹⁹ Jehova, Nungungulu wa tiyimpi, hi vuxe luswa; Maha a nghohe ya wena yi woninga, kasi hi hanyiswa.