Tisimu 79 - Tshwa Bible

Wena Nungungulu wa kuhanyisa ka hina.

Lisimu la Asafa,

¹ Nungungulu, a vamatiko va enghenile tshombeni ya wena, Va hanahanisile a tempeli ya wena ya kubasa, Jerusalema va gi mahile marumbi.

² Va nyikile a zirumbi za malanza ya wena akuva zi giwa hi tinyanyani ta tilo, Ni nyama ya vabasileko va wena ka zivanza za misava.

³ Va halatile a nkhata wabye khwatsi i mati matlhelweni wontihe ya Jerusalema; Ku wa nga hi na munhu wa ku va lahla.

⁴ Hi mahile a xiruko ka vaakelwane va hina, Hi maha a tseketselo ni xihlekiso ka lava va hi ranzelako.

⁵ Ku ta kala kuva rini, Jehova, na wa ha zangarile? A xiluse xa wena xi ta vura khwatsi i nzilo kala rini?

⁶ Chulula a zanga ya wena xikari ka vamatiko lava va nga ku tiviko, Ni ka matiko lawa ma nga vitaniko a vito ga wena.

⁷ Hakuva va khadamule Jakobe, Va hangalasile a wuakelo gakwe.

⁸ U ngave na mavila ha hina hi kota ya zigoho za vadadani va hina; Ngha a tipswalo ta wena ti hatlisa ku hi vikela; Hakuva hi xaniseka nguvu.

⁹ Hi vune, Nungungulu wa kuhanyiswa ka hina, Hi kota ya wudumo ga vito ga wena; Hi ponise, u hi rivalela a zionho za hina Hi kota ya vito ga wena.

¹⁰ Hikuyini a vamatiko va ta nga wula, vaku: I kwihi Nungungulu wabye? A zi tibyiwe ka vamatiko a kuwoneni ka hina, Lezaku u photelisa kuyini a nkhata wu halatilweko wa malanza ya wena. Ekso. 32:12; Deut. 32:43; Joeli 2:17

¹¹ A kutsikwila ka tiperesu a kute mahlweni ka wena; Ponisa hi ntamu wa woko ga wena lava va konelweko kufa.

¹² Hosi, tlhelisela hi ka ntlhanu ni kumbiri a xifuveni xa vaakelwane va hina A nzhukano leyi va ku rukileko ha xona.

¹³ Zonake hina vanhu va wena, ni ntlhambi wa wuriselo ga wena, Hi ta ku bonga kala kupinzuka; Hi ta hlawutela a kudumisa ka wena zizukulwaneni zontlhe.