Tisimu 78 - Tshwa Bible

A mitiro ya Nungungulu.

Maxili ya Asafa.

¹ Wena tiko ga mina, ingisa a kugonzisa ka mina; Kangatelani tindleve ka magezu ya nomu wa mina.

² Nzi ta vulula a nomu wa mina hi mufananiso; Nzi wulawula a mitseketo ya kale. Mat. 13:35

³ Lezi hi nga zizwa, hi zi tiva; Lezi a vadadani va nga hi byela,

⁴ Hi nga ta zi fihlela a vana vabye; Hi ta tlhatlhambutela a wudumo ga Jehova ka xizukulwana lexi xi tako, Ni ntamu wakwe, ni zirewukiso lezi a zi mahileko.

⁵ Hakuva i lo yimisa a wumboni ka Jakobe, A veka nawo ka Israeli, Lowu a nga wu leletela ka vadadani va hina, lezaku va gonzisa a vana vabye. Ekso. 20:1; Deut. 4:9; Ezek. 20:10

⁶ Lezaku wu ta tibyiwa hi zizukulwana za ha tako, Hi vanana lava va ta nga belekiwa, Va kula va byela vanana vabye,

⁷ Lezaku va tsumba Nungungulu, Va nga rivali mitiro ya Nungungulu, Va hlayisa milayo yakwe.

⁸ Va nga fanani ni vararu vabye, A xizukulwana xa xikaha ni kuhluwuka, A xizukulwana xi nga hiko na mbilu yo tiya, Lexi a moya wa xona wu nga kholekangiko ka Nungungulu Ekso. 32:9; 33:3; 34:9

⁹ A vana va Efraime, lava va hlomileko mawura, Va lo tlhelela nzhako hi siku ga kulwa.

¹⁰ A va hlayisangi a xivumelwano xa Nungungulu, Va lo ala ku famba hi nawo wakwe.

¹¹ Va lo rivala a mitiro yakwe. Ni zihlamaliso lezi a nga va kombisa.

¹² I lo maha zihlamaliso kuwoneni ka vararu vabye, Lomu tikweni ga Gipite, ni le Zoani.

¹³ I lo avanyisa bimbi, a va tlhatukisa, A maha mati ma yima khwatsi i nhulu.

¹⁴ Ni hlikanhi i lo va rangela hi refu, Ni wusiku gontlhe hi kuwonekela ka nzilo. Ekso. 13:21

¹⁵ I lo panza maribye le xiwuleni, A va nwisa khwatsi hi loku vanwa a mati ya lomu kueteni. Ekso. 17:6; Mitse. 20:10

¹⁶ I lo humesa a milonga hi lomu maribyeni, A maha mati ma khulunga khwatsi micongo.

¹⁷ Hambu zi hi tano, va lo tlhela va mu onhela, Hi ku vuka Loyi a Hunzeleleko Kutlakuka le xiwuleni.

¹⁸ Va lo ringa Nungungulu timbilwini tabye, Hi ku kombela zakuga za kunavela kabye. Ekso. 16:2; Mitse. 11:4

¹⁹ Va lo hleva Nungungulu, vaku: Xana Nungungulu a nga zi kota ku hi phamela kwalomu xiwuleni ke?

²⁰ Kunene, i loba a ribye gi huma a mati, Ku khulunga micongo; Kanilezi wa zi kota ku nyika zakuga, Ni ku nyika a nyama ka tiko gakwe ke?

²¹ Loku Jehova a zi zwile, i lo zangara, Zonake a nzilo wu lo vurela Jakobe, Ni zanga yi tela Israeli.

²² Hakuva a va kholwangi ka Nungungulu, A va tsumbangi kuhanyiseni kakwe.

²³ I lo leletela a marefu le hehla, A wuya a vulula a tivati ta tilo;

²⁴ A va nisela a mana kuva kuga kabye, A va nyika mavele ya tilo. Ekso. 16:4; Joh. 6:31; 1 Kor. 10:3

²⁵ A vanhu va loga a zibaba za tingelosi, A va rumela a kuga ku ringeneko.

²⁶ I lo humesa a mheho ya Mutsuwuka-gambo le tilweni, A fambisa a mheho ya le Dzongeni hi ntamu wakwe.

²⁷ A va nisela nyama khwatsi i tshuri, Ni tinyanyani ta tipapa khwatsi i seke ga bimbi;

²⁸ I lo zi wisa wugovelweni gabye, Wontihe matlhelo ya wuakelo gabye.

²⁹ Va loga va xura nguvu, I va nyikile lezi va nga zi navela.

³⁰ Kanilezi va wa nga eneliswangi kunaveleni kabye, A zakuga na za hi lomu milonwini yabye,

³¹ A zanga ya Nungungulu yi lota hehla kabye; I lo daya a tinhenha tabye A wisa a majaha ya ka Israeli.

³² Hambu zi hi tano, va lo engeta va onha; Va nga kholwi a zihlamaliso zakwe.

³³ I lo va tsika, a masiku yabye ma mbhela hi leʼzi nga nyawuliko, Va mbheta malembe yabye hi kuchava.

³⁴ Laha yena a nga va hihirita, zonake va lo mu hlota, Va hunzuluka, va hlotisisa Nungungulu.

³⁵ Va lo alakanya lezaku Nungungulu i wa hi ribye gabye, Ni lezaku Nungungulu loyi a nga Hehlahehla hi mutiruli wabye;

³⁶ Kanilezi va lo mu khohlisa hi milomu yabye, Va mu hembela hi tirimi tabye, Isa. 29:13; Jer. 12:2

³⁷ Hakuva a timbilu tabye ti wa nga namarelangi kakwe, Kambe a va tsumbekangi xivumelwaneni xakwe.

³⁸ Kanilezi yena na hi ni tipswalo, i lo va tsetselela, a nga va lovisangi; I lo ti khoma zangeni yakwe zikhati zo tala, A nga tsikangi a khulo gakwe gontlhe gi vuka. Ekso. 34:6; Joeli 2:13

³⁹ Hakuva i lo alakanya lezaku va hi nyama ntsena; Va hi moya lowu wu hunzako wu nga ha wuyi kambe.

⁴⁰ Zikhati zingani va nga mu hluwuka xiwuleni, Va mu zwisa kubayisa lomu cuweni.

⁴¹ Ina, va lo engeta va ringa Nungungulu, Va tsanwisa Wakubasa wa Israeli.

⁴² A va alakanyangi lezi a va tireleko, Hi siku legi a nga va tlhatlhisa valaleni,

⁴³ Laha a nga kombisa a masingita yakwe le Gipite, Ni zihlamaliso zakwe tikweni ga Zoani,

⁴⁴ A hunzula micongo yabye yiva nkhata, Va tsanzeka kunwa a mati ya wona. Ekso. 7:19

⁴⁵ I lo va rumela mabawani, ma va hihirita, Ni makhele lawa ma nga va daya.

⁴⁶ I lo rumela pungwani lomu masinwini yabye, A nyika humbi a pfuno wabye. Ekso. 10:4

⁴⁷ I lo daya zivina zabye hi maralala, Ni mikuwu yabye hi xirami;

⁴⁸ I lo nyiketa a tihomu tabye maralaleni, Ni mitlhambi yabye ka zingwalangwanza.

⁴⁹ I lo va rumela a zanga yakwe yi hisako, A khulo, ni kutsanwa, ni zikarato. A ntlawa ta tingelosi ta makhombo.

⁵⁰ Laha na nyika xikhati ka zanga yakwe, A nga ponisangi ni muhefemulo wabye kufeni, I lo nyikela a wutomi gabye ka ntungu.

⁵¹ I loba wontihe matewula ya le Gipite, Ni tinhonzwa ta ntamu wabye lomu matendeni ya Hamu. Ekso. 11:5; 12:29

⁵² I lo humesa vanhu vakwe khwatsi tiyivu, A va rangela lomu xiwuleni kotisa ntlhambi.

⁵³ A va rangela khwatsi, va nga chavi nchumu, Kanilezi a valala vabye va lo khubunyetwa hi bimbi. Ekso. 14:19

⁵⁴ I lo va neha tikweni gakwe ga kubasa, Ka xitsunga lexi a nga ti kumele xona hi canja gakwe ga xinene.

⁵⁵ I lo hlongola a vamatiko mahlweni kabye, A va avanyisela a tshomba yabye hi lipimo, A akisa a tixaka ta ka Israeli matendeni yabye.

⁵⁶ Kanilezi va lo ringa Nungungulu loyi a Hunzeleleko Kutlakuka va mu hluwuka, A va hlayisangi a wumboni gakwe.

⁵⁷ Va lo tlhelela nzhako, va khohlisa kota vararu vabye, Vaku khwatsi hi wura legi gi khohlisako.

⁵⁸ Va lo mu zangarisa hi matshamu yabye ma tlakukileko, Va vuxa xiluse xakwe hi zifananiso zabye. Deut. 32:16, 21

⁵⁹ Laha Nungungulu a nga zizwa i lo zangara, A swireka nguvu hi vaIsraeli,

⁶⁰ Kala a tsika a tenda gakwe ga le Xilo, A tenda legi a gi yimisileko xikari ka vanhu. Jox. 18:1; 1 Sam. 4:11; Jer. 7:12

⁶¹ A tsika arke gakwe giya wukhumbini, Ni wudumo gakwe giya mandleni ya valala.

⁶² A nyikela vanhu vakwe ka supado, A zangarela a tshomba yakwe.

⁶³ A majaha yabye ma lo hihiritwa hi nzilo, Ni vanhwana vabye a va dzunziwangi kutekiweni.

⁶⁴ A vapristi vabye va lo dawa hi supado, Ni tinoni ta kona a ti hlalukangi.

⁶⁵ Zonake a Hosi yi lo khindlimuka khwatsi yi wa hi kuetleleni, Khwatsi hi nhenha yi kanyulukiswako hi byala.

⁶⁶ I lo hlasela valala vakwe va tlhelela nzhako, A va nyikela tinganeni ti nga mbheliko.

⁶⁷ Kambe i lo ala a tenda ga Josefa, A hunza a lixaka la ka Efraime;

⁶⁸ Kanilezi i lo hlawula a lixaka la ka Juda, A xitsunga xa Zioni lexi a xi ranzako.

⁶⁹ I akile a wutshamu gakwe ga kubasa gi tlakuka khwatsi i tilo, Gi tiya kota misava leyi a yi tiyisileko kala kupinzuka.

⁷⁰ Zonake i lo hlawula Davida a nanza gakwe, A mu teka lomu marangeni ya tiyivu. 1 Sam. 16:11

⁷¹ I lo mu teka laha a nga risa mapswele ya tiyivu, A mu veka a kuva murisi wa Jakobe, a tiko gakwe, Na Israeli, a tshomba yakwe. 2 Sam. 7:8

⁷² Na Davida i lo va risa hi kululama ka mbilu yakwe, A va rangela hi matlhari ya mandla yakwe.