Tisimu 76 - Tshwa Bible

Nungungulu wa Israeli wa hlula valala.

Ka muchuli wa Neginote. Lisimu la Asafa.

¹ Nungungulu i tibyiwa a ka Juda; A vito gakwe ga hombe ka Israeli.

² A tenda gakwe gi le Salema; Ni wuakelo gakwe gi le Zioni.

³ Hi laho a tshovileko a tigalala ta mawura, A xitlhangu ni supado, ni matlhari ya yimpi. (Sela.)

⁴ U vangamela ni kuva ni ntamu, Ku hunza a zitsunga za vaphangi.

⁵ A vanhu va wurena va phangilwe, Va ti etlelele a wurongo gabye ga magumo; Tontlhe a tinhenha a ti zi kotangi ku ti lwela. 2 Tih. 19:35; Jer. 51:39, 57; Nah. 3:18

⁶ Vontlhe vakhileli va tikareta va etlele ni mahaxi yabye. Hi kota ya kukawukwa hi wena, Nungungulu wa Jakobe.

⁷ Wena wa chaveka; Himani a nga yimako mahlweni ka wena loku u zangarile ke?

⁸ U lo zwata a kulamula ka wena hi le tilweni, A misava yi lo chava, yi miyela,

⁹ Loku Nungungulu a yima a ku ta lamula, Kasi ku ponisa lava va koramileko laha misaveni. (Sela.)

¹⁰ Hizinene, a zanga ya munhu yi ta ku dumisa; A xipanze xa zanga yakwe u ta xi ambala. Ekso. 9:16; Rom. 9:17

¹¹ Fungani ka Jehova a Nungungulu wa nwina, mu tatisa zifungo za nwina; Vontlhe lava va mu ranzeleko ngha va neha zinyikiwo ka loyi a faneleko ku chabyiwa. Deut. 23:21

¹² Wa bohlisa a kutikulisa ka tihosana, Wa chaveka ka tihosi ta misava.