Tisimu 73 - Tshwa Bible

A Bhuku ga Wunharu Nungungulu i ntamu wa mbilu ya mina.

Lisimu la Asafa.

¹ Hakunene, Nungungulu i nene ka Israeli, Ka lava va nga ni timbilu to basa. Mat. 5:8

² Kasike, a milenge ya mina yi wa lava ku nzi wisa, A mikonzo ya mina yi wa lava ku retemuka.

³ Hakuva nzi wa hi ni xiluse hi lava va matshanza, Loku nzi wona a kuvuvuma ka vakubiha. Joba 21:7; Jer. 12:1

⁴ Hakuva, a va na kuxaniseka kala kufeni kabye, Va hanya, a mimiri yabye yi kulukile.

⁵ A va karateki kota vanwani vanhu, A va hlokiswi kukota vanwani vanhu.

⁶ Hikwalaho kutikulisa zingwavila zabye, Va ambele tihanyi kukotisa nguwo.

⁷ A mahlo yabye ma nyokovele hi mafura, Va na ni zo tala ku hunza a kunavela ka mbilu. Deut. 32:15; Jer. 5:28

⁸ Va tseketsela, va wulawula tihanyi kubiheni kabye, Va wulawula magezu yo ti kukumuxa.

⁹ Va tlakukela tilweni hi milomu yabye, A tirimi tabye ti navalata misaveni yontlhe.

¹⁰ Hikwalaho a tiko gakwe gi cuwuka a tlhelo gabye, Ni mati ya kutala ma nwiwa hi vona.

¹¹ Vaku: Nungungulu i zi tivisa kuyini? I na ni wutivi loyi a Hunzeleleko Kutlakuka ke?

¹² Va maha lezo a vanhu va kubiha, Va tshameka wontihe masiku, ku enzeleka kufuma kabye.

¹³ Hakunene, nzi basisile a mbilu ya mina mahala, Nzi hlamba mandla ya mina na nzi nga hi na nanzu;

¹⁴ Hakuva nzi lo hlokiswa a siku gontlhe, Nzi tsayiswa mixo ni mixo.

¹⁵ Loku nzi wa no: Nzi ta wulawulisa lezi; Ngha nzi kanganyisile a xizukulwana xa vana va wena.

¹⁶ Laha nzi nga alakanya a timhaka leti a kuva nzi ti pimisisa, Zi wa nzi karata nguvu,

¹⁷ Kala nziya wutshanwini ga kubasa ga Nungungulu, Nzi khumbula a kugumelwa kabye.

¹⁸ Hizinene, u va veka matshanwini ya kuretemuka; U va hoxa hasi kulobyisweni.

¹⁹ Va lobyisisilwe kuyini hi xitshuketi! Vona vafa, va hetiswa hi kuchava.

²⁰ Khwatsi i noro loku hi vukile, Wena Hosi, loku u vuka u ta tlangamela xiwumbeko xabye.

²¹ Laha a mbilu ya mina yi nga karateka, Nzi tlhabyiwa tisweni ta mina,

²² Nzi wa hi xipumbu nzi nga tivi nchumu; Nzi wa ku khwatsi nzi xihari mahlweni ka wena.

²³ Hambu zi hi tano, nzi na wena masiku wontihe; U nzi khomile hi canja ga wena ga xinene.

²⁴ U ta nzi rangela hi wusungukati ga wena, Zonake u nzi amukela wukosini ga wena.

²⁵ Himani nzi nga naye le tilweni ahandle ka wena ke? Loku nzi hi na wena a nzi naveli nchumu misaveni.

²⁶ A miri wa mina ni mbilu ya mina zi rerekile, Kanilezi Nungungulu hi ribye ga mbilu ya mina, Xiavelo xa mina kala kupinzuka.

²⁷ Hakuya lava va sukileko ka wena va ta lova; Wena u lovisa vontlhe lava va ku fularelako.

²⁸ Kanilezi zi nzi sasekele a ku tshama kusuhi ni Nungungulu; Nzi mahile Hosi Jehova a kuva wuchavelo ga mina, Kasi nza fela ku tlhatlhambutela a mitiro ya wena yontlhe.