Tisimu 68 - Tshwa Bible

Nungungulu i nyika ntamu.

Ka muchuli. Lisimu la Davida la kuyimbelelwa.

¹ Ngha Nungungulu a vuka, a valala vakwe va hangalaka, Ni lava va mu vengako va tsutsuma mahlweni kakwe. Mitse. 10:35

² U va hlongola khwatsi hi musi wu kukuletwako hi mheho; A vakubiha va lova mahlweni ka Nungungulu Khwatsi i sera yi nyekiswako hi nzilo.

³ Kanilezi a vakululama va tsaka, va khana mahlweni ka Nungungulu; Ina, va tsaka nguvu.

⁴ Yimbelelani ka Nungungulu, dumisani a vito gakwe; Mu longiseleni a gonzo loyi a tsemakanyako a ziwula; A vito gakwe hi Jehova, tsakani mahlweni kakwe. Ekso. 15:1; Isa. 40:3

⁵ I dadani wa zisiwana, tlhelo muyimeli wa tinoni, Nungungulu i lomu wuakelweni gakwe go basa. Deut. 10:18

⁶ Nungungulu i nyika kaya ka lava va tsikilweko, Wa tlhatlhisa tiperesu tiva ni makatekwa; Kanilezi lava va mu alako va tshama tikweni ga kuwoma. Isa. 42:7

⁷ Nungungulu, laha u nga huma u rangela a vanhu va wena, U tsemakanya xiwula, (Sela.) Ekso. 13:21; 33:14

⁸ A misava yi lo tsekatseka, Ni matilo ma lo nyeka mahlweni ka Nungungulu. Na Sinai i lo rurumela mahlweni ka Nungungulu, A Nungungulu wa Israeli. Ekso. 19:16, 18; Vala. 5:4

⁹ Nungungulu, u lo nisa vula ya hombe, U tiyiseta ha yona a tshomba ya wena laha yi nga rereka. Ekso. 16:4

¹⁰ A hlengeletano ya wena yi vumelwe ku aka lomo; Hi wuxinji ga wena, Nungungulu; u lo yi longisela lava va tsimbeketilweko.

¹¹ A Hosi yi lo zwata a gezu, Xa hombe a xidlemo xa vavasati va bako hungu ga kutsaka; Ekso. 15:20; 1 Sam. 18:6

¹² A tihosi ta tiyimpi ti tsutsuma, ti tsutsuma, Ni mamani a seleko kaya wa avanyisa muphango.

¹³ Hambu loku mu etlela marangeni ya nwina, A tipapa ta tuva ti pomelwe hi siliva, Ni mitsenga ya gona ya hatima khwatsi i nzalama.

¹⁴ Laha Nyamintamu a nga hangalasa a tihosi laha tikweni, Ku wa hi ni gapongo hehla ka Salmoni.

¹⁵ A xitsunga xa Baxani, xitsunga xa Nungungulu, A xitsunga xa Baxani xitsunga xi tlakukileko.

¹⁶ Nwina zitsunga zi tlakukileko, hikuyini mu cuwukelako hi xiluse A xitsunga lexi Nungungulu a nga xi hlawula a kuva wutshamu gakwe ke? Kunene, Jehova i ta tshama ka xona kala kupinzuka.

¹⁷ A tikareta ta Nungungulu ti hi mazana ya mazana, Ku nga makume ya mazana ma wuyetilweko, A Hosi yi lomu xikari ka tona; Sinai gi lomu wutshanwini gi basileko. Dan. 7:10

¹⁸ Wena u tlakukela hehla, u yisa a vakhomiwa; U amukele a zinyikiwo hi ka vanhu, Ina, ni xikari ka lava va hluwukileko, kasi Jehova Nungungulu wa fela ku tshama xikari ka vona.

¹⁹ A yi dumiswe a Hosi leyi yi rwalako a minzhwalo ya hina wontihe masiku; Nungungulu i kuhanyiswa ka hina. (Sela.)

²⁰ Ka hina Nungungulu hi Nungungulu loyi a hanyisako; Jehova a Hosi wa zi kota ku hanyisa kufeni. Kuv. 1:18

²¹ Kanilezi Nungungulu i ta faya a tihloko ta valala vakwe; A lipala la loyi a simamisako kugoheni kakwe.

²² A Hosi yite: Nzi ta va tlhelisa hi le Baxani, Nzi va wuyisa hi le kueteni ka bimhi; Am. 9:2

²³ Kasi u fela ku peta a nkonzo wa wena nkhateni, Ni lezaku a tirimi ta timbyana ta wena ta kuma a xiavelo xa valala.

²⁴ Nungungulu, va wonile a kufamba ka wena; A kufamba ka Nungungulu wa mina, a Hosi ya mina, loku a enghena wutshanwini gi basileko.

²⁵ A vayimbeleli va ranga mahlweni, Lenzhako ku lanzela vabi va magubhu. Xikari ka vanhwana lava va bako tingomana.

²⁶ Dumisani Nungungulu lomu tihlengeletanweni; Dumisani Hosi, nwina va hlowo ya ka Israeli. Isa. 48:1

²⁷ Laho ku na Benjamini a nzisana, mufumeli wabye; Ni tihosana ta ka Juda ni butho ga tona, Ni tihosana ta Zebuloni, ni tihosana ta Naftali. Vala. 5:18; 6:35; 1 Sam. 9:21

²⁸ Nungungulu wa wena i leletele lezaku uva ni ntamu. Nungungulu, tiyisa a ntiro lowu u hi maheleko wona,

²⁹ Na u hi lomu tempeleni ya wena le Jerusalema; A tihosi ti ta ku humesela zinyikiwo.

³⁰ Kawuka a xihari xa lomu hlangeni; A ntlhambi ya tikuzi, ni marole ya matiko, A va ku khizamele va humesa zipanze za siliva. Hangalasa a matiko lawa ma tsakako hi tiyimpi. Isa. 30:6

³¹ A tihosana ti tata hi le Gipite, Lokuloku Etiopia i ta tshambuluta a mandla yakwe ka Nungungulu. Isa. 18:7; Miti. 8:26

³² Yimbelelani ka Nungungulu, nwina mifumo ya misava, Yimbelelani mu dumisa Hosi, (Sela.)

³³ Leyi yi tako na yi khilele a matilo ya kale ka matiko; Languta, wa humesa gezu gakwe hi ntamu. Deut. 33:26

³⁴ Zwatani a ntamu wa Nungungulu; A kungangamela kakwe ku le hehla ka Israeli, Ni ntamu wakwe wu le marefini.

³⁵ Nungungulu, wa chaveka le wu tshanwini ga wena go basa; Nungungulu wa Israeli i nyika ntamu ni kufuma ka vanhu vakwe. A khesiwe Nungungulu!