Tisimu 67 - Tshwa Bible

Nungungulu i ta hi katekisa.

Ka muchuli wa Neginote. Lisimu la kuyimbelelwa.

¹ Nungungulu, ngha a hi ni wuxinji ka hina, a hi katekisa, Ni ku wonginga hi nghohe yakwe hehla ka hina. (Sela.) Mitse. 6:24

² Kasi a ndlela ya wena ya tibyiwa laha misaveni, Ni kuhanyisa ka wena xikari ka matiko wontihe. Isa. 60:3; Lu. 2:30

³ Ngha matiko ma bonga wena, Nungungulu, A matiko wontihe a ma bonge wena.

⁴ Ngha matiko ma tsaka, ma yimbelela hi kukhana, Hakuva u ta lamula matiko hi nongameto, U rangela a mifumo laha misaveni. (Sela.)

⁵ Ngha vanhu va bonga wena, Nungungulu; A matiko wontihe a ma bonge wena.

⁶ A misava yi humesile a mihanzu ya yona, Nungungulu, yena Nungungulu wa hina, i ta hi katekisa. Levi 26:4

⁷ Nungungulu i ta hi katekisa; Kontlhe kugumelwa ka misava ku ta mu chava.