Tisimu 66 - Tshwa Bible

Mahani wukosi gakwe gi ngangamela.

Ka muchuli. Lisimu la kuyimbelelwa.

¹ Hlalelani hi kutsaka ka Nungungulu, Nwina nwentlhe matiko.

² Yimbelelani a wukulu ga vito gakwe, Dzumeletani a wudzunzo gakwe.

³ Muku ka Nungungulu: Yi rewukisa kuyini a mitiro ya wena! Hi kota ya wukulu ga ntamu wa wena a valala va wena va ti koramisa. Deut. 33:29

⁴ Yontlhe misava yi ta ku khizamela, yi ku dumisa; Yi ta yimbelela a vito ga wena. (Sela.)

⁵ Tanani, mu wona a mitiro ya Nungungulu; Za hlamalisa a zimaho zakwe ka vanana va vanhu.

⁶ I hunzulusile bimbi a gi maha muhanza wu womileko, Va lo famba hi milenge va tlatuka congo; Hi lo mu tsakela laho. Ekso. 14:21; Jox. 3:18

⁷ I fumela hi ntamu wakwe kala kupinzuka; A mahlo yakwe ma languta vamatiko. Lava va hluwukileko ngha va nga ti kulisi. (Sela.) 2 Kro. 16:9

⁸ Nwina matiko, khesani Nungungulu wa hina, Zwatani a gezu ga kudumisa kakwe,

⁹ Loyi a hanyisileko mihefemulo ya hina, A nga vumelangi lezaku a mikonzo ya hina yi khuveka.

¹⁰ Hakuva wena Nungungulu u hi ringile, U hi hlutile kota lezi siliva yi hlutiwako. Mav. 17:3; 1 Ped. 1:7

¹¹ U lo hi enghenisa ntlhanwini, U rwexa a nzhwalo wo binza ziwunwini za hina.

¹² U kanzihisile vanhu tihlokweni ta hina, Hi lo hunza xikari ka nzilo, ni xikari ka mati, Kanilezi wena u hi humesile kasi ku hi nyika kutlhatlheka.

¹³ Nzi ta enghena ndlwini ya wena ni minyikelo ya kuhiswa, Nzi ta ku riha a zifungo lezi nzi ku hlambanyileko,

¹⁴ Lezi zi humileko milonwini ya mina, Lezi a nomu wa mina wu zi wulileko laha nzi nga hi zikaratweni.

¹⁵ Nzi ta ku humesela a tiyivu ti nonileko akuva minyikelo ya kuhiswa, Zinwe ni masema ya tihamba ti hisiwako; Nzi ta nyikela a tikuzi ni timhongo. (Sela.)

¹⁶ Tanani mu tazwa, nwina nwentlhe mu chavako Nungungulu, Nzi ta tlhatlhambuta lezi a nzi maheleko zona,

¹⁷ Nzi lo mu vitana hi nomu wa mina, Nzi mu dzumeleta hi lirimi la mina.

¹⁸ Loku nzi wa alakanyile a kubiha lomu mbilwini ya mina, A Hosi ngha yi nga nzi zwangi. Joba 27:8; Isa. 59:2; Joh. 9:31

¹⁹ Kanilezi Nungungulu i nzi zwile, I ingisile a gezu ka kukombela ka mina.

²⁰ A khesiwe Nungungulu loyi a nga alangiko a mukombelo wa mina, Loyi a nga nzi tekelangiko a wuxinji gakwe.