Tisimu 65 - Tshwa Bible

A lisimu la kubonga.

Ka muchuli. Lisimu la Davida la kuyimbelelwa.

¹ Nungungulu, u dumiswa hi kurula le Zioni; A zifungo za vanhu zi rihiwa ka wena kona.

² Wena loyi u zwako mikhongelo, A nyama yontlhe yi tata ka wena.

³ A zigoho zi nzi binzela mina, Kanilezi u ta tsetselela a zihambuko za hina.

⁴ I katekile a munhu loye wena u mu hlawulako, loye u mu tshinelako ka wena, Kasi a fela ku tshama ziluvelweni za wena. Hina hi ta xura hi malongo ya yindlu ya wena, Le wutshanwini go basa ga tempeli ya wena.

⁵ U hi hlamula a kululameni hi mitiro yi rewukisako, Nungungulu wa kuhanyiswa ka hina; Wena loyi u nga kutsumba ka kontlhe kugumelwa ka misava, Ni ka bimbi legi gi nga kule. 2 Sam. 7:23

⁶ Wena loyi u tiyisako a zitsunga hi ntamu wa wena; Na u ambele ntamu.

⁷ Loyi u miyetako a kugobhoza ka bimbi, A kugobhoza ka mabyandlati ya gona, Ni vilinganya ya matiko.

⁸ Lava va akileko a magemeta-musi va chava a masingita ya wena; Wena u tsakisa a matlhelo ya Mutsuwuka-gambo ni Mupela-gambo.

⁹ U enzela misava, u yi tsanisa, U yi pfunisa nguvu; A congo wa Nungungulu wu tele hi mati. Wena u va nyika mavele, loku u longisisile lezo a misava. Deut. 11:11

¹⁰ Wena u tsakamisa a mikhuleko ya yona, Ni ku lulamisa a sava gi rimilweko; U gi olovisa hi vula, U katekisa a zimilo za gona.

¹¹ U tatisa a lembe hi malongo ya wena, A mabatha ya mikonzo ya wena ma dona mafura.

¹² Ma donela magelweni ya xiwula. Ni zitsunga zi ambexwa litsako. Joba 38:25

¹³ A magelo ma fenengela hi mitlhambi, Ni minzhelelo kambe yi fenengetiwa hi mavele. Zona zi hlalela hi litsako, zi yimbelela.