Tisimu 64 - Tshwa Bible

Mukombelo wa ku vikelwa ka vobiha.

Ka muchuli. Lisimu la Davida.

¹ Nungungulu, zwana a gezu ga kurila ka mina, Ponisa wutomi ga mina ka nala loyi a nzi chavisako.

² Nzi vikele makungweni ya vakubiha, Ni ka xidlemo xa vangalulamangiko.

³ Va lota tirimi tabye khwatsi i supado, Va wula magezu yo biha khwatsi hi ku fula ka miseve,

⁴ Kasi ku fula kufihlaleni loye a lu lamileko, Hi xitshuketi va mu fula, va nga chavi nchumu.

⁵ Va ti tiyiseta makungweni yo biha, Va maha xikungo xo demba mitlhamu xihundleni. Vaku: Himani a to zi wona? Joba 22:13

⁶ Va alakanyela mano yo biha, vaku: Hi hetile a xikungo xi mbheleleko. A maalakanyo ni mbilu ya munhu zi etile nguvu.

⁷ Kanilezi Nungungulu i ta va fula hi tigalala, Hi xitshuketi va ta lamatwa.

⁸ Va khunguvanyekiswa hi tirimi tabye wutsumbu; Vontlhe lava va zi wonako va ta ziviza tihloko.

⁹ A vanhu vontlhe va ta chava, Va ta tlhatlhambutela mitiro ya Nungungulu, Va alakanya lezi a zi tirileko.

¹⁰ A wakululama i ta tsakela Jehova, a mu tsumba; Vontlhe lava va nga ni timbilu ti lulamileko va ta ti kulisa.