Tisimu 62 - Tshwa Bible

A ku tsumba Nungungulu ntsena.

Ka muchuli wa Jedutune. Lisimu la Davida.

¹ A muhefemulo wa mina wu langutela Nungungulu yece; A kuhanyisa ka mina kuta hi ka yena.

² Hi yena yece a nga ribye ga mina ni kuhanyiswa ka mina; I khokhola ga mina, nzi nga ta tsekatsekiswa nguvu.

³ Ku ta kala kuva rini na ma ha zangarela munhu loyi ke, A ku mu lovisa khatiginwe? Kotisa a khurisi gi khuyukileko ni lihlavu li lavako kuwa.

⁴ Va maha xikungo ntsena ku mu wisa hasi na hi kutlakukeni kakwe, Va tsakiswa hi mawunwa; Va katekisa hi milomu yabye, Na va rukatela timbilwini tabye. (Sela.)

⁵ Muhefemulo wa mina, langutela Nungungulu yece, Hakuva a kutsumba ka mina kuta hi ka yena.

⁶ Hi yena yece a nga ribye ga mina ni kuhanyiswa ka mina, I khokhola ga mina, nzi nga ta tsekatsekiswa:

⁷ A kuhanyiswa ka mina ni wudzunzo ga mina zi ka Nungungulu; A ribye ga ntamu wa mina, ni wuchavelo ga mina zi le ka Nungungulu.

⁸ Nwina vanhu, tsumbani yena masiku wontihe; Chululani timbilu ta nwina mahlweni kakwe: Nungungulu hi wuchavelo ga hina. (Sela.)

⁹ Kunene, a vanhu va wulahasi a va nyawuli, Ni vanhu va hombe mbunwa ntsena; Loku va vekiwa xikalwini va hehuka ku hunza kuhefemula. Isa. 40:15, 17; Dan. 5:27

¹⁰ Mu nga tsumbi tihanyi, Ge hambu ku ti kulisa hi wukhamba; Loku kufuma ku enzeleka, mu nga zi khataleli. Joba 31:24; Lu. 12:16; 1 Tim. 6:17

¹¹ Nungungulu i wulile kanwe. Nzi zi zwile kumbiri lezaku A ntamu ngwa Nungungulu.

¹² Ni wuxinji kambe gi lumba wena, Hosi; Hakuva u tlhelisela munhu ni munhu maringano ni mitiro yakwe. Rom. 2:6; 1 Kor. 3:8; Kuv. 22:12