Tisimu 61 - Tshwa Bible

A ribye legi gi tlakukileko ku nzi hunza.

Ka muchuli wa Negina. Lisimu la Davida.

¹ Nungungulu, zwana kurila ka mina, Ingisa a mukombelo wa mina.

² Nzi rilela ka wena na nzi hi magemeta-musi wa misava, Hakuva a mbilu ya mina ya mbhela ntamu; Nzi fambise ribyeni legi gi tlakukileko ku nzi hunza.

³ Hakuva u wuchavelo ga mina, U khokhola gi tiyileko mahlweni ka nala. Mav. 18:10; Nah. 1:7

⁴ Nzi ta tshama tendeni ga wena kala kupinzuka; Nzi ta chavela kufihlaleni ka tipapa ta wena. (Sela.) 2 Sam. 7:11

⁵ Hakuva wena Nungungulu u zwile a zifungo za mina, U nzi nyikile a tshomba ya lava va chavako a vito ga wena.

⁶ U lehisa a masiku ya hosi, A malembe ya yona ma taku khwatsi zizukulwana zo tala.

⁷ Yi ta tshama xitshanwini xakwe xa wuhosi mahlweni ka Nungungulu kala kupinzuka; Ngha a tipswalo ni kululama zi mu gongola.

⁸ Zonake nzi ta dumisa a vito ga wena kala kupinzuka, Kasi nza tatisa a zifungo za mina siku ni siku.