Tisimu 6 - Tshwa Bible

A mukombelo wa ku tlhatlhiswa valaleni. Ka muchuli wa Neginote ni Xeminite. Lisimu la Davida,

¹ Jehova, u nga nzibi zangeni ya wena, U nga nzi tsayisi hi kota ya kutsanwa ka wena. Tis. 38:2; Jer. 10:24

² Nzi zwele wuxinji, O Jehova, hakuva nzi na ni gome; Jehova, nzi chume, hakuva a marambu ya mina ma rurumela.

³ Ni muhefemulo wa mina wa rurumela; Jehova, u ta hlwela kala kuve rini?

⁴ Tlhela Jehova, u tlhatlhisa muhefemulo wa mina, U nzi hanyisa hi kota ya wuxinji ga wena.

⁵ Hakuva kufeni a ka ha alakanyiwi; Himani a ta nga ku bonga le Xeole ke? Tis. 88:11; Isa. 38:18

⁶ Nzi karele hi kuketa, Wusiku ni mumu nzi tsakamisa a sango ga mina hi kurila, Nzi tsakamisa a wuriri ga mina hi mihloti.

⁷ A mahlo ya mina ma mbhela hi hlomulo; Ma lutsumile hi kota ya vontlhe a valala va mina.

⁸ Sukani ka mina, nwina nwentlhe vamahi va kubiha; Hakuva Jehova i zwile a kurila ka mina.

⁹ Jehova i zwile a kukombela ka mina, Jehova wa amukela a mukombelo wa mina.

¹⁰ Vontlhe valala va mina va ta su koyo tingana, va karateka, Va ta tlhela nzhako va wiswa tingana hi xitsuketi. Tis. 83:17