Tisimu 59 - Tshwa Bible

Wuchavelo ga muxaniseki.

Ka muchuli, Altaskite, Miktamu ya Davida, laha Saule a nga ruma ku ya mu lavelela le ndlwini kasi va mu daya.

¹ Nungungulu wa mina, nzi tlhatlhise ka valala va mina, U nzi yimela ka lava va nzi vukelako.

² Nzi tlhatlhise ka vamahi va kubiha, Nzi ponise ka zigevenga.

³ Hakuva va nzi xiyelela; A vanhu va lunya va tsombana va nzi vukela; Hambu nzi nga hambunyetangi ne ni ku onha, Jehova.

⁴ Hambu nzi nga hi na nanzu, va tsutsuma na va hlomile; Vuka, u nzi khinga, u languta.

⁵ Ina, wena Jehova, Nungungulu wa tiyimpi, Nungungulu wa Israeli, Vuka, u tsayisa vontlhe vamatiko; U ngave na wuxinji ka munwe wa vamahi va kubiha. (Sela.)

⁶ Va wuya laha gambyeni, va wukula kotisa timbyana, Na va fambafamba mutini.

⁷ A milomu yabye yi humesa manyala, A tisupado ti lomu milonwini yabye; Vaku: Himani loyi a zi zwako?

⁸ Kanilezi wena Jehova wa va hleka, U hleka vontlhe vamatiko.

⁹ Wena ntamu wa mina, nzi ta ku langutela, Hakuva Nungungulu hi khokhola ga mina.

¹⁰ Nungungulu i ta nzi tlhangaveta hi wuxinji gakwe, I ta tsakisa a mahlo ya mina loku nzi wona lava va nzi xiyelelako.

¹¹ U nga va dayi, a tiko ga mina gi nga dzuka gi zi rivala; Va hangalasa hi ntamu wa wena, u va wisa lahasi, Hosi, xitlhangu xa hina.

¹² Loku ku huma gezu milonwini yabye, ku huma xionho; Ngha va phasiwa hi matshanza yabye, Hi kota ya tihlamba ni mawunwa lawa va ma wulako.

¹³ Va lovise zangeni ya wena, u va lovisa lezaku va nga have kona; Ngha va tiva lezaku Nungungulu wa fumela Jakobe, Ni le magemeta-musi ya misava. (Sela.)

¹⁴ Hambu loku va wuya laha gambyeni, va wukula kota timbyana, Va fambafamba lomu mutini,

¹⁵ Va tsenzeleka va hlota zakuga, Va pilekana wusiku gontlhe loku va nga xuri, Isa. 8:21

¹⁶ Kanilezi mina nzi ta yimbelela a ntamu wa wena, Ina, ni mixo nzi ta yimbelela hi wuxinji ga wena hi gezu ga hombe, Hakuva u wa hi khokhola ga mina, Ni wuchavelo hi siku ga khombo ga mina.

¹⁷ Ntamu wa mina, nzi ta ku dumisa hi kuyimbelela, Hakuva Nungungulu i khokhola ga mina, A Nungungulu loyi a nzi mahelako wuxinji.