Tisimu 53 - Tshwa Bible

A kubiha ka vatseketseli.

Ka muchuli wa Mahalate. Lisimu la Davida.

¹ A phuphulu gi wula mbilwini ya gona, giku: A ku kona Nungungulu. Vona va bolile, va maha mitiro yo nyenyeza; A ku kona loyi a mahako kusaseka.

² Nungungulu wa cuwuka a vana va vanhu na hi le tilweni, Kasi ku wona loku a hi kona loye a pimako, Loyi a hlotako Nungungulu. Rom. 3:10

³ Vontlhe va hambukile, va nyenyezisilwe yona vontlhe; A nga kona a mahako kusaseka, ge hambu ni munwe.

⁴ Vontlhe a vamahi va kubiha, a va na kutiva ke? Lava va gako vanhu va mina khwatsi hi loku vaga xibaba, Na va nga kombeli ka Nungungulu.

⁵ Va wa hi ni kuchava ka hombe lomo, Laha ku nga kala ku nga hi na nchumu wo chavisa; Hakuva Nungungulu i hangalasile a marambu ya lava va ku ranzelako; U va wisile tingana hakuva Nungungulu i va tsikile.

⁶ O, loku ku wo khwatsi a kuhanyisa ka Israeli ku wa ta huma hi le Zioni! Laha Nungungulu a tlhelisako vanhu vakwe hi le kukhonweni; Zonake Jakobe i ta tsaka, na Israeli i ta nengela. Gen. 49:18; Lu. 10:24