Tisimu 5 - Tshwa Bible

Davida a kombela Nungungulu ku mu vunetela.

Ka muchuli wa Nehilote. Lisimu la Davida.

¹ Jehova, zwana kuwulawula ka mina, U ingisa a kuketa ka mbilu ya mina.

² Ingisa kurila ka mina, Hosi ya mina ni Nungungulu wa mina, Hakuva nza ku kombela.

³ Jehova, wazwa a gezu ga mina ni mixo, Nzi kombela ka wena laha mixweni, nzi ku langutela.

⁴ Hakuva wena a ku Nungungulu a tsakiswako hi kubiha; A wa kubiha a nga zi koti a ku tshama na wena.

⁵ A vamatshanza va nga ta yima mahlweni ka wena, Hakuva wa venga vontlhe a vamahi va kubiha.

⁶ U lovisa lava va wulawulako mawunwa; Jehova wa nyenya a zigevenga ni vakhohlisi. Tis. 55:23; Miti. 5:5, 10

⁷ Kanilezi mina nzi enghena ndlwini ya wena hi kota ya wuxinji ga wena ga hombe; Nzi khizama hi xichawo ngomama ni tempeli ya wena yo basa.

⁸ Jehova, nzi rangele kululameni ka wena hi kota ya valala va mina; Lulameta a ndlela ya wena mahlweni ka mina.

⁹ Hakuva a ku na kutsumbeka milonwini yabye, A timbilu tabye ti tele hi kubiha; A minkolo yabye zilahla zi ahlamileko; Va wulawula mahlenga hi tirimi tabye. Rom. 3:13

¹⁰ Va lamule, O Nungungulu, va wise zikungweni zabye; U va hlongola hi kota ya zihambunyeto zabye zo tala, Hakuva vona va ku hluwukile.

¹¹ Kanilezi ngha va tsaka vontlhe lava va ku mahako wuponelo gabye; Ngha va buma xontlhe xikhati hakuva wena wa va vikela; Lava va ranzako a vito ga wena a va tatiswe hi litsako.

¹² Hakuva wena Jehova u katekisa loyi a lulamileko, U mu vikela hi wuxinji ga wena khwatsi xitlhangu.