Tisimu 48 - Tshwa Bible

Muti wa Nungungulu wa hina.

Lisimu la kuyimbelelwa hi vana va Kora.

¹ Jehova ngwa hombe, i fanelwe hi ku dumiswa nguvu, Lomu mutini wa Nungungulu wa hina, laha xitsungeni xakwe xo basa.

² Xi sasekile a xitsunga xa Zioni, xi tsakisa a misava yontlhe, Xi le tlhelo ga Nwalungu, a muti wa Hosi ya hombe. Mat. 5:35

³ Lomu tindlwini ta wona ta wuhosi Nungungulu i tibyiwa kota wuchavelo.

⁴ Hakuva a tihosi ti wa tsombene, Ti hunza zinwe. 2 Kro. 20:1

⁵ Ti lo wu wona, ti hlamala; Ti lo chava ti tsutsuma.

⁶ Ti lo sangula ku rurumela Kukotisa kulunwa ka wasati.

⁷ Wena u panza a mataru ya le Tarxixi hi mheho ya Mutsuwuka-gambo. Isa. 33:23

⁸ Lezi hi nga zizwa, hi zi wonile Lomu mutini wa Jehova wa tiyimpi, A mutini wa Nungungulu wa hina; Jehova i ta wu lonzowota kala kupinzuka. (Sela.)

⁹ Nungungulu, hi ehleketa hi wunene ga wena Lomu tempeleni ya wena.

¹⁰ Nungungulu, khwatsi hilezi a vito ga wena gi tibyiwako, Zinghaho a kudumisa ka wena ku chikela magumelweni ya misava; A canja ga wena ga xinene gi tele hi kululama.

¹¹ Ngha xitsunga xa Zioni xi tsaka, A va tsake a vanhwana va ka Juda, Hi kota ya kulamula ka wena.

¹² Tsemakanyani Zioni, mu gi renzelekela, Hlayani a makhokhola ya gona.

¹³ Cuwukisani khwatsi a ligingisi la gona, Mu langutela a tiyindlu ta gona ta wuhosi, Kasi ma fela ku tlhatlhambutela ka xizukulwana xa ha tako.

¹⁴ Hakuva Nungungulu loyi, i Nungungulu wa hina kala kupinzuka; I tava murangeli wa hina kala kufeni.