Tisimu 45 - Tshwa Bible

Lisimu la Liranzo.

Ka muchuli, hehla ka Xoxanimu, hi kota ya Vana va Kora, Maxili, Xizimba xa Liranzo.

¹ A mbilu ya mina ya pupuma hi magezu yo saseka; Nziku: A lisimu la mina li xungeta a hosi; A lirimi la mina i peni ya mutsali a tlharihileko.

² Wena u lipswitla ku hunza a vanana va vanhu; A malongo ma chululwe milonwini ya wena, Hikwalaho Nungungulu i ku katekisile kala kupinzuka. Xiz. 5:10; Lu. 4:22

³ Nhenha nziwena, boha supado ya wena nyongeni ya wena, Ni kungangamela ka wena ni wudzunzo ga wena.

⁴ Khilela haxi hi kungangamela ka wena u ya hlula, Na u lwela zinene, ni kurutisa, ni kululama; Zonake a canja ga wena ga xinene gi ta ku gonzisa mitiro yi rewukisako.

⁵ A miseve ya wena ya kariha, A matiko ma ta wela lahasi ka wena, Yi tlhava timbilwini ta valala va hosi.

⁶ Nungungulu, a xitshamu xa wena xa wuhosi xa kala kupinzuka; A nhonga ya wena ya wuhosi i nhonga ya nongameto. 2 Sam. 7:13, 16; Maheb. 1:8

⁷ Wena u ranza kululama, u venga kubiha; Hikwalaho Nungungulu, a Nungungulu wa wena, I ku totile hi mafura ya litsako ku hunza vanakuloni.

⁸ Tontlhe a tinguwo ta wena ti nuhela a mure, ni mubandwa, ni mpepo; Va ku tsakisa hi zitende hi lomu tindlwini ti akilweko hi timhonzo ta tindlovu.

⁹ A vanhwana va tihosi va xikari ka malanza ya wena; A muzinza wu yimile hi canjeni ga wena ga zinene, Na wu bombisilwe hi nzalama ya le Ofira.

¹⁰ Ingisa, nhwana, pimisisa, u reya ndleve ya wena, Rivala va ka nwina, ni yindlu ya dadani wa wena. Gen. 12:1

¹¹ A hosi yi navela a wumbhuri ga wena, Hi yena nwinyi wa wena, yi khizamela.

¹² A nhwana wa Tire i ta humesa zinyikiwo, Ni vafumileko va ta koxa a thomo ga wena. Isa. 23:18; 60:6

¹³ A nhwana wa hosi wa ngangamela hi wukosi lomu ndlwini, A tinguwo takwe ti lukilwe hi nzalama.

¹⁴ I yiswa hosini na bombile hi nguwo yi komelweko, Na a pangalatwa hi tipheleketi takwe ta mibulwa.

¹⁵ Va ta tiswa na va yimbelela hi kutsaka, Va enghena ndlwini ya hosi.

¹⁶ A xikhundleni xa vararu va wena ku tava vana va wena, U ta va maha tihosana misaveni yontlhe. Mat. 19:28; Kuv. 1:6; 5:10

¹⁷ Nzi ta dzumeleta a vito ga wena zizukulwaneni zontlhe, Hikwalaho matiko wontihe ma ta ku dumisa kala kupinzuka.