Tisimu 43 - Tshwa Bible

A mukombelo wa kuhanyiswa.

¹ Nungungulu, tsema mhaka ya mina, u nzi yimela Ka lixaka leli li nga hiko na wunene; Nzi hlangute ka vakhohlisi ni lava va nga lulamangiko.

² Hakuva wena Nungungulu u khokhola ga mina; Hikuyini u nzi hoxileko ke? Hi yini nzi fambako na nzi rila hi kota ya ku tsimbeketwa hi valala ke?

³ Rumela a kuwonekela ka wena ni zinene za wena, zi nzi rangela; Zi nzi yisa xitsungeni xa wena xi basileko, Ni le tindlwini ta wena. 2 Sam. 6:17

⁴ Zonake nzi taya alatini ga Nungungulu, A Nungungulu loyi a nga kutsaka ka mina ka hombe; Nzi ta ku dumisa hi xitende, Nungungulu, Nungungulu wa mina.

⁵ Muhefemulo wa mina, Hi yini u xanisekako u karateka lomu nzeni ka mina ke? Tsumba ka Nungungulu, hakuva nza ha ta mu dumisa, Loyi a nga kuhanyisa ka mina ni Nungungulu wa mina.