Tisimu 42 - Tshwa Bible

A Bhuku ga Wumbiri Loyi a xanisekako a navela yindlu ya Nungungulu.

Ka muchuli, Maxili, ya Vana va Kora.

¹ Khwatsi hi pswele ga hlangu gi navelako micongweni ya mati, Zinghaho a muhefemulo wa mina wa navela wena, Nungungulu.

² A muhefemulo wa mina wuzwa tora ha Nungungulu, ha yena Nungungulu a hanyako; Hi rini nzi ta ngata nzi ta woneka mahlweni ka Nungungulu ke?

³ A mihloti ya mina kuga ka mina mumu ni wusiku, Hakuva wontihe masiku va wula ka mina, vaku: I kwihi makunu a Nungungulu wa wena ke?

⁴ A muhefemulo wa mina wu rila laha na nzi alakanya Lezaku nzi wa fambisa kuyini ni zidlemo, Nzi zi rangela ndlwini ya Nungungulu Hi magezu ya litsako zinwe ni kudumisa; A xidlemo xi gongako a siku ga ximuse.

⁵ Muhefemulo wa mina, Hi yini u xanisekako u karateka lomu nzeni ka mina ke? Tsumba ka Nungungulu, hakuva nza ha ta mu dumisa, Hi kota ya kuhanyisa loku ku tako hi le nghoheni yakwe.

⁶ Nungungulu wa mina, a muhefemulo wa mina wa xaniseka nzeni ka mina; Hikwalaho nza ku alakanya na nzi hi tikweni ga Jordani, Ni le Hermoni, ni le xitsungeni xa Mizare.

⁷ A kueta ku vitana kueta hi guwa ga mabomubomu ya wena; Wontihe a mabyandlati ya wena ni mavikuviku ya wena ma nzi khubunyetile.

⁸ Laha hlikanhini Jehova i wa lelela a wuxinji gakwe ha mina, Ni laha wusikwini nzi wa kari nzi yimbelela ha yena, Nzi kombela ka Nungungulu wa wutomi ga mina.

⁹ Nzi taku ka Nungungulu, a nga ribye ga mina: Hi yini u nzi rivakeleko ke? Hi yini nzi fambako na nzi rila hi kota ya ku tsimbeketwa hi valala ke?

¹⁰ Ku fanana ni kutshobyiwa ka marambu ya mina, Loku a valala va mina va nzi rukatela; Va simamisa va wula ka mina, vaku: I kwihi a Nungungulu wa wena ke?

¹¹ Muhefemulo wa mina, Hi yini u xanisekako u karateka lomu nzeni ka mina ke? Tsumba ka Nungungulu, hakuva nza ha ta mu dumisa, Loyi a nga kuhanyisa ka mina ni Nungungulu wa mina.