Tisimu 41 - Tshwa Bible

A mukombelo wa loyi a ranzelweko hi valala.

Ka muchuli. Lisimu la Davida.

¹ I katekile loyi a zwelako lava va vumalako, Jehova i ta mu hlanguta hi siku ga khombo. Mav. 19:17; Isa. 58:7

² Jehova i ta mu lonzowota a mu hanyisa, I ta katekiswa lomu tikweni; U nga ta mu nyikela kuranzeni ka valala vakwe. Dan. 4:24

³ Jehova i ta mu tiyiseta loku a hi sangweni ga kubabya; Wena u hunzulusa a mubhedi wakwe loku a kari a babya. 2 Tih. 20:7

⁴ Nzi te ngalo: Jehova, nzi mahele wuxinji; Chuma a muhefemulo wa mina, hakuva nzi ku onhele.

⁵ A valala va mina va wulawula ha mina hi wukhuxu, vaku: I tafa rini, kasi gi fuva a vito gakwe?

⁶ Loku munhu ata a ta nzi wona, i wulawula hi ku xengetela; A mbilu yakwe yi hlengeletela za wuxezi; A byeletela ha zona laha yena a humako handle.

⁷ Vontlhe lava va nzi vengako va hleva ha mina; Va tsema makungo ya kubiha ha mina, vaku:

⁸ A nghumbe yo tshisa yi mu tsimbaretile; Lezi a nga sangweni, a nga ta ha vuka kambe.

⁹ Ina, ni munghana wa mina, loyi nzi nga mu tsumba, Loye a ngaga zakuga za mina, i nzi tlakusele xirenze. Mat. 26:14; Lu. 22:4; Miti. 1:16

¹⁰ Kanilezi wena Jehova, ngha uva ni wuxinji ka mina, u nzi vuxa, Kasi nza fela ku va tlhelisela.

¹¹ Nza zi tiva lezaku wa nzi ranza, Hakuva a nala a nga vumelwi ku hlalela ha mina.

¹² Wena wa nzi seketela kululameni ka mina, Masiku wontihe wa nzi veka mahlweni ka wena.

¹³ A bongiwe Jehova, a Nungungulu wa Israeli, Kusukela kupinzukeni kala kupinzuka! Amen, Amen!