Tisimu 4 - Tshwa Bible

A lisimu la ku tsumba Jehova.

Ca muchuli wa Neginote. Lisimu la Davida.

¹ Loku nzi vitana, nzi hlamule, wena Nungungulu wa kululama ka mina, Wena loyi u nzi tlhatlhisileko laha nzi nga hi kuhlokisweni, Nzi mahele wuxinji, uzwa a mukombelo wa mina.

² Nwina vana va vanhu, ku ta kala kuva rini a wudzunzo ga mina na gi hunzuka giva tingana ke? Ku ta kala kuva rini na ma ha ranza leʼzi nga nyawuliko ni ku hlota mawunwa ke? (Sela.)

³ Tivani lezaku Jehova i ti hlawulele a munhu nene; Jehova i ta nzizwa loku nzi vitana ka yena.

⁴ Rurumelani, mu nga onhi; Ehleketani loku mu hi masangweni ya nwina, Mu rutisa. (Sela.)

⁵ Nyikelani a miphahlelo ya kululama, Na mu tsumba Jehova. Tis. 51:19, 21; Rom. 12:1

⁶ Mbanyingi va wulako, vaku: Himani a ta nga hi kombisa leʼzi nga nene? Jehova, hi woningele hi kuwonekela ka nghohe ya wena.

⁷ U tsakisile a mbilu ya mina Ku hunza a kutsaka ka timbilu tabye Loku va nyikwa mavele ni vinya go tala.

⁸ Nzi ta ti lata nzi etlela hi kurula, Hakuva wena Jehova wa nzi vumela ku tshama kuponeni. Deut. 33:28