Tisimu 39 - Tshwa Bible

A kugumelwa ka munhu.

Ka muchuli wa Jedutuni. Lisimu la Davida.

¹ Mina nzi te ngalo: Nzi ta chela kota hi mahanyela ya mina, Kasi nzi nga onhi hi lirimi la mina; Nzi ta hlayisa a nomu wa mina hi matomu Loku a wakubiha a hi mahlweni ka mina.

² Nzi wa hi mbeveve, nzi miyela, Nzi su tiwitiwi bhi kuxanisekeni ka mina, Ni hlomulo wa mina wu lo enzeleka.

³ A mbilu ya mina yi wo hisa nzeni ka mina, Laha nzi nga ehleketa ku lo vutsuka a nzilo; A lirimi la mina li wula liku:

⁴ Jehova, nzi tivise a kugumelwa ka mina, Kasi nza tiva a tsengo wa masiku ya mina; Nzi tivise lezaku nzi muhunzi.

⁵ U mahile a masiku ya mina a ku khwatsi hi kuanama ka canja; A xikhati xa kuhanya ka mina a hi nchumu mahlweni ka wena; Kunene, ni wihi munhu, hambu loku a tiyile, kuhefemula ntsena. (Sela.)

⁶ A munhu wa famba a ku fanana ni xiruti, A ti karata mahala; Wa hlengeletela, kanilezi a nga zi tivi lezaku zi ta giwa hi mani. Joba 8:9; 14:2; Mutsa. 2:18, 21

⁷ Makunu, Hosi, nza ha rinzela yi ni ke? A kutsumba ka mina ku le ka wena.

⁸ Nzi tlhatlhise zihambukweni zontlhe za mina; U nga nzi mahi nziva xihlekiso xa zipumbu.

⁹ Nza miyela, a nzi vululi nomu wa mina, Hakuva hi wena u zi tirileko.

¹⁰ U nga ha nzibi; Nza mbhela ntamu hi kuba ka canja ga wena.

¹¹ Loku u tsayisa munhu hi kota ya kubiha, U maha wukosi gakwe gi mbhela khwatsi hi loku gi giwa hi tisumba; Kunene, vanhu vontlhe kuhefemula ntsena. (Sela.)

¹² Jehova, zwana mukombelo wa mina, dembela ndleve kurileni ka mina, U nga miyeli loku nzi kari nzi rila mihloti; Hakuva nzi mupfhumba ka wena, Nzi muluveli khwatsi hi vadadani va mina vontlhe. Gen. 47:9; Maheb. 11:13; 1 Ped. 2:11

¹³ U nga ha nzi cuwukeli, kasi nza tlhela nzi tsaka, Na nzi nga se ku hunza nzi ngavi kona.