Tisimu 36 - Tshwa Bible

A wunene ga Nungungulu.

Ka muchuli. Lisimu la Davida a nanza ga Jehova.

¹ Nzi ehleketa hi lezi a xigoho xi wulako ka wakubiha; A ku chava Nungungulu a ku ko na mahlweni kakwe. Rom. 3:18

² Hakuva xa mu byela zilo zi xalalisako mahlo yakwe, Lezaku a xionho xakwe xi nga ta kumeka xi vengiwa.

³ A timhaka ta nomu wakwe ti bihile ni ku khohlisa; I tsikile wutlhari ni ku maha kusasa.

⁴ I alakanyela lezi zi bihileko sangweni gakwe; I famba hi ndlela yi nga hiko nene; A nga swiriwi hi kubiha. Mav. 4:16; Mika 2:1

⁵ Jehova, a wuxinji ga wena gi chikele matilweni; Ni kutsumbeka ka wena ku chikela marefini,

⁶ A kululama ka wena ku fanana ni zitsunga za hombe, Ni kulamula ka wena ku etile ku fanana ni bimbi, Jehova, u lonzowota vanhu ni zihari. Rom. 11:33

⁷ Gi ranzekisa kuyini a wuxinji ga wena, O Nungungulu! A vana va vanhu va chavela lahasi ka tipapa ta wena.

⁸ Va xuriswa hi malongo ya yindlu ya wena; U va nwisa a mati ya congo wa kuxalala ka wena.

⁹ Hakuva a xibuka xa wutomi xi le ka wena, A kuwonekeleni ka wena hi ta wona kuwonekela. Jer. 2:13; 17:13

¹⁰ Engetela a wuxinji ga wena ka lava va ku tivako, Ni kululama ka wena ka lava a timbilu tabye ti lulamileko.

¹¹ Ngha konzo wa wamatshanza wu nga nzi kanziheli; A canja ga wakubiha gi nga nzi hlongoli.

¹² A vatiri va kubiha va sina va wile hasi; Va wisilwe hasi, va nga ha ta vuka.