Tisimu 35 - Tshwa Bible

Mukombelo wa loyi a xaniswako.

Lisimu la Davida,

¹ Jehova, nzi yimele ka lava va nzi vukelako; Lwana ni lava va lwako na mina.

² Khoma a xitlhangu ni ngenge, U yima u nzi vuna.

³ Hloma a tlhari, u vala ndlela ya lava va nzi hlongolisako; Wula ka muhefemulo wa mina, uku: Nzi kuhanyisa ka wena.

⁴ Ngha va kanakana, va wiswa tingana lava va hlotako wutomi ga mina; A va tlheliswe nzhako va kanganyiseka lava va lavako ku nzi lamata.

⁵ Ngha va ku khwatsi i mungu lo wu kukuletwako hi mheho; A va hlongoliswe hi ngelosi ya Jehova.

⁶ Ngha a ndlela yabye yi phuma yi retemuka; A va hlongoliswe hi ngelosi ya Jehova. Jox. 10:10; Tis. 69:23

⁷ Hakuva ahandle ka mhaka va nzi dembele ntlhamu; Va nzi kelele rinzi go susa wutomi ga mina ahandle ka xigelo. Miti. 22:15

⁸ A kulobyiswa a ku wele hehla kabye hi xitshuketi; Ngha va phasiwe vona venyi hi ntlhamu lowu va wu dembileko, Va wela kulobyisweni kwaloko.

⁹ Zonake a muhefemulo wa mina wu ta tsakela Jehova; Wunengela hi kota ya kuhanyisa kakwe.

¹⁰ A marambu ya mina wontihe ma taku: Jehova, himani a fananako na wena, Loyi a tlhatlhisako a xisiwana ka loyi a mu tlulako hi ntamu, Ina, loyi a tsimbeketilweko ni muvumali a ka loyi a mu wutlelako ke?

¹¹ Ku humele a vakustumunyu va mawunwa, Va nzi wutisa a timhaka nzi nga ti tiviko. Mat. 28:60; Lu. 23:2, 10; Joh. 18:30

¹² A kusasa ka mina va tlhelisela hi kubiha, Nzi tsikiwa nzoce.

¹³ Kasilezi laha va nga babya nzi wa ambala tinguwo ta xirilo; Na nzi hlokisa a muhefemulo wa mina hi kuyila, Nzi va kombelela a hloko ya mina na yi koramile.

¹⁴ Nzi lo maha khwatsi hi loku va wa hi maxaka ya mina kutani vanakulori; Nzi lo korama nzi rila khwatsi hi loku nzi rilela a mamani.

¹⁵ Kanilezi loku nzi khunguvanyeka va tsaka, va tsombana khatiginwe; Lava nzi nga va tiviko va tsombana kasi ku nzi vukela; A va tsiki ku nzi pfemula. Mat. 26:3

¹⁶ Kota vatseketseli va hlekiselako zakuga mibuzweni, Vona va getsela meno yabye ha mina.

¹⁷ Hosi, u ta zi cuwukela kala kuva rini ke? Ponisa muhefemulo wa mina kuloviseni kabye, Ni wutomi ga mina tinghaleni.

¹⁸ Zonake nzi ta ku bonga tlhanganweni wa hombe, Nzi ku dumisa xikari ka vanhu vanyingi.

¹⁹ Va nga tsaki ha mina lava va nga valala va mina handle ka xigelo, Hambu ku tsunyeta hi mahlo lava va nzi vengako handle ka nanzu. Joh. 15:25

²⁰ Hakuva a ku na kurula kuwulawuleni kabye, Kanilezi va lumbeta lava va rutisileko lomu tikweni.

²¹ Ina, va nzi ahlamela milomu yabye, Vaku: Haha! haha! a mahlo ya hina ma zi wonile. Joh. 16:10

²² Jehova, u zi wonile; u nga rutisi! Hosi, u ngave kule na mina.

²³ Vuka, u nzi yimela, u nzi lulamisela; Yimela a mhaka ya mina, wena Nungungulu wa mina ni Hosi ya mina.

²⁴ Jehova, Nungungulu wa mina, Nzi lulamisele kotisa a kululama ka wena; Ngha va nga bumi ha mina.

²⁵ Ngha va nga wuli timbilwini tabye, vaku: Inaka! hi kuxuva ka hina loko! Ngha va nga wuli, vaku: Hi mu mitile.

²⁶ Ngha va wiswa tingana, va kanganyiseka vontlhe lava va tsakako hi khombo ga mina; A va ambexwe hi tingana ni kungadzunziwi lava va ti kukumuxako va nzi vukela.

²⁷ Ngha va hlalela hi kutsaka lava va ranzako akuva nzi humelela mhakeni, A masiku wontihe ngha va wula, vaku: A khesiwe Jehova, Loyi a xalalako hi kuvuvuma ka nanza gakwe!

²⁸ Zonake a lirimi la mina li ta hlawutela a kululama ka wena. Li wulawula kudumisa ka wena gontlhe siku.