Tisimu 34 - Tshwa Bible

Jehova i nene.

Lisimu la Davida, laha a nga ti hungukisa mahlweni ka Abimeleki, a hlongolwa hi yena.

¹ Nzi ta dumisa Jehova wontihe masiku; Nzi ta mu bonga hi nomu wa mina xontlhe xikhati.

² A muhefemulo wa mina wu ta ti kulisa ha Jehova; Lava va koramileko va ta zizwa va tsaka.

³ Dumisani Jehova zinwe na mina; A hi kuliseni zinwe a vito gakwe.

⁴ Nzi lo hlota Jehova, i lo nzi hlamula; I lo nzi tlhatlhisa kuchaveni ka mina kontlhe.

⁵ Lava va cuwukako ka yena va ta nwayitana hi litsako, Ni tinghohe tabye a ti na tingana.

⁶ A munhu loyi wa xisiwana i lo kombela, na Jehova i lo ingisa, A mu ponisa zikaratweni zakwe zontlhe.

⁷ A ngelosi ya Jehova yi gova yi ranzela lava va mu chavako, Yi va tlhatlhisa. Gen. 32:1; 2 Tih. 6:17

⁸ Ringani mu wona lezaku Jehova i nene; I katekile a munhu loyi a chavelako ka yena. 1 Ped. 2:3

⁹ Chaveni Jehova, nwina vobasa vakwe, Hakuva lava va mu chavako a va vumali nchumu.

¹⁰ A zinghalana zi nga vumala, ni kuzwa ndlala, Kanilezi lava va hlotako Jehova va nga ta vumala ni nchumu wunwe wo saseka. Lu. 1:53

¹¹ Ngonani vanana, mu nzi ingisela; Nzi ta mu gonzisa xichavo xa Jehova.

¹² Himani loyi a xuvako wutomi, Ni ku ranza masiku ya kusaseka? 1 Ped. 3:10

¹³ Hlayisa lirimi la wena kubiheni, Ni milomu ya wena ka magezu ya kukhohlisa. Efe. 4:29; 5:4; Kol. 4:6

¹⁴ Suka kubiheni, u maha kusaseka; Hlota kurula, u ku lanzela. Rom. 12:18; Maheb. 12:14

¹⁵ A mahlo ya Jehova ma tsonometa a valulamileko; Ni tindleve takwe ti kangatele huwa yabye. 2 Kro. 16:9

¹⁶ Kanilezi a nghohe ya Jehova yi ta tsanwa ka lava va mahako kubiha, Kasi ku fuvisa kualakanya kabye laha misaveni.

¹⁷ Loku a valulamileko va rila, Jehova wa ingisa; A va tlhatlhisa zikaratweni zabye.

¹⁸ Jehova i kusuhi ni lava va tshovekileko timbilu; A hanyisa lava va nga ni moya wu panzekileko. Isa. 57:15; 66:2; Lu. 18:13

¹⁹ A makhombo ya loyi a lulamileko manyingi; Kanilezi Jehova wa mu hlanguta ka wona wontihe.

²⁰ Wa hlayisa marambu yakwe wontihe, Ku nga ta tshoveka hambu ni ginwe. Ekso. 12:46; Mat. 10:30; Joh. 19:36

²¹ A khombo gi ta daya a wakubiha, Ni lava va vengako a valulamileko va ta koneka.

²² Jehova wa tirula a mihefemulo ya malanza yakwe; Ku nga ta koneka ni munwe wa lava va chavelako ka yena.