Tisimu 32 - Tshwa Bible

Nzi vumele kuonha ka mina.

Lisimu la Davida, Maxili.

¹ I katekile yena loyi a xihambuko xakwe xi tsetselelweko, Loyi a xionho xakwe xi fenengetilweko. Rom. 4:6

² I katekile a munhu loyi Jehova a nga mu hlayeliko kuonha, Loyi a moya wakwe wu nga hiko na kukhohlisa.

³ Laha nzi nga miyela a marambu ya mina ma lo gutlagutla Hi kuketa ka mina gontlhe siku.

⁴ Hakuva a mumu ni wusiku a canja ga wena gi wa binzile hehla ka mina; A nzhongo wa mina wu lo womiswa ku fana ni kuvalela ka ximumu. (Sela.)

⁵ Nzi ku tivisile a kuonha ka mina, A kugoha ka mina a nzi ku fihlangi. Nzi te ngalo: Nzi ta vumela a zihambuko za mina ka Jehova; Zonake u tsetselele a nanzu wa kuonha ka mina. (Sela.) 2 Sam. 12:13; 1 Joh. 1:9

⁶ Hi kota ya lezo ngha vontlhe va lulamileko va khongela ka wena A xikhatini lexi wena wa ha kumiwako; Hakunene, laha a mati ya hombe ma khulungako ma nga ta chikela ka vona. Isa. 49:8; 2 Kor. 6:2

⁷ Wena u wuchavelo ga mina, wa nzi lonzowota zikaratweni; U ta nzi ranzela hi tisimu ta kuponiswa. (Sela.)

⁸ Nzi ta ku gonzisa nzi ku komba a ndlela leyi u to famba ha yona; Nzi ta ku luleka, a mahlo ya mina na ma ku langutile.

⁹ Mu nge khwatsi mu mahaxi kutani timbongola, leti ti nga hiko na kupima; Leto a kufuya ka tona ku nga matomu ma ti khomako; Loku ti nga hi nawo a ti na ku tshinela ka wena. 2 Tih. 19:28; Mav. 26:3

¹⁰ A wakubiha i na ni zixaniso zo tala, Kanilezi loyi a tsumbako Jehova i ta mahelwa wuxinji.

¹¹ Tsakeleni Jehova, mu nengela nwina va kululama, Mu hlalela hi litsako nwina nwentlhe mu longamileko mbilwini. Fil. 4:4