Tisimu 3 - Tshwa Bible

Davida a rila ka Jehova.

Lisimu la Davida laha a nga tsutsuma mahlweni ka Absalome, a nʼwana wakwe.

¹ Jehova, va talisile ku yini a valala va mina! Mbanyingi lava va nzi vukelako!

² Mbanyingi lava va wulako ha mina: Nungungulu a nga ta ha mu hlanguta. (Sela.) 2 Sam. 16:7

³ Kanilezi wena Jehova u xitlhangu xa mina, U wukosi ga mina, loyi a tlakusako hloko ya mina.

⁴ Nzi vitana ka Jehova hi gezu ga mina, Yena wa nzi hlamula hi le xitsungeni xakwe xo basa. (Sela.)

⁵ Nza ti lata, nzi etlela wurongo, Nzi tlhela nzi vuka, hakuva Jehova wa nzi tiyisa.

⁶ A nzi chavi mazana-zana ya vanhu, Lava va nzi ranzeleko matlhelo wontihe. Tis. 27:3

⁷ Vuka Jehova! nzi ponise, O Nungungulu wa mina! Hakuva hi wena u bako a marama ya valala va mina vontlhe, U tshova meno ya vakubiha.

⁸ A kuhanyisa kuta hi ka Jehova: A xikatekiso xa wena ngha xive hehla ka vanhu va wena. (Sela.) Isa. 43:11