Tisimu 24 - Tshwa Bible

A Hosi ya kungangamela.

Lisimu la Davida.

¹ A misava nja Jehova, ni kutala ka yona, A tiko ni lava va tshamako ka gona. Ekso. 19:5; Deut. 10:14; 1 Kor. 10:26

² Hakuva yena i yi seketele hehla ka mabimbi, Ni ku yi tiyisa hehla ka mintalo.

³ Himani a ta nga kanziha xitsungeni xa Jehova? Himani a ta nga yima wutshanwini gakwe go basa ke?

⁴ Hi loye a nga ni mandla ma basileko, ni mbilu yi hlazekileko; Loye a nga nyiketeliko muhefemulo wakwe mawunweni, Loye a nga hlambanyiko hi kukhohlisa. Mat. 5:8

⁵ Yena i ta amukela a xikatekiso hi ka Jehova, Ni kululama hi ka Nungungulu wa kuhanyiswa kakwe.

⁶ Xi tshamisa lezo a xizukulwana xa vona lava va mu lavako, Lava va hlotako nghohe ya wena, Nungungulu wa Jakobe. (Sela.) Rom. 9:6

⁷ Tinyangwa, tlakusani tihloko ta nwina; Ti tlakuseni nwina tivati ta pinzukelwa, Kasi ku enghena a Hosi ya kungangamela.

⁸ Himani a Hosi ya kungangamela ke? Hi Jehova a nga ni ntamu, a nga nghwazi; Jehova i nghwazi ya kulwa. Ekso. 15:3

⁹ Tinyangwa, tlakusani tihloko ta nwina; Ina, ti tlakuseni nwina tivati ta pinzukelwa, Kasi ku enghena a Hosi ya kungangamela.

¹⁰ Himani a Hosi leyi ya kungangamela ke? Hi Jehova wa tiyimpi; Hi yena a Hosi ya kungangamela. (Sela.)