Tisimu 22 - Tshwa Bible

A xirilo xa loyi a tsikilweko.

Ka muchuli wa Aijeleti Xahare. Lisimu la Davida.

¹ Nungungulu wa mina, Nungungulu wa mina, U nzi tsikele yini ke? Hikuyini u yimile kule, u nga nzi vuni, Na u nga anguli kurila ka mina?

² Nungungulu wa mina, nza rila ni hlikanhi kanilezi a ku hlamuli; Ni laha wusikwini kambe a nzi kumi kurula.

³ Kasi wena u basile, Wena loyi u tshamako xiluvelweni xa kudumisa ka Israeli.

⁴ A vadadani va hina va ku tsumbile, Va lo tsumba, u va ponisa.

⁵ Va lo rilela ka wena, va tlhatlhiswa; Va ku tsumbile, hikwalaho a va wisiwangi tingana.

⁶ Kanilezi mina nzi xiwungwani, a nzi munhu; Nzi xisolo vanhwini, nzi kanyiswa hi tiko. Isa. 52:14; 53:3

⁷ Vontlhe va nzi wonako va nzi hleka, Va monya, va ziviza, vaku: Mat. 27:39; Mar. 15:29; Lu. 23:35

⁸ I tsumbile Jehova, a mu tlhatlhise! A mu hanyise, lezi a tsakako ha yena. Mat. 27:43

⁹ Hi wena u nzi humesileko rumbyini ga mamani, U lo nzi hlayisa laha na nzi hi maveleni yakwe,

¹⁰ Kusukela kupswalweni nzi wa hi mawokweni ya wena, U Nungungulu wa mina kusukela rumbyini ga mamani.

¹¹ U ngave kule na mina, hakuva zikarato zi tshinele, Na nzi nga hi na muvuni.

¹² Nzi ranzelwe hi tikuzi to tala, A tikuzi ta ntamu ta le Baxani ti nzi ranzele.

¹³ Ti nzi ahlamela milomu. Khwatsi hi nghala yi khadamulako yi dzumadzuma.

¹⁴ Nzi halatilwe lahasi kota mati, A marambu, ya mina ma khuyukele; A mbilu ya mina yi fanana ni sera, Yi nyekile nzeni ka mina.

¹⁵ A ntamu wa mina wu womile khwatsi xirengele, A lirimi la mina li namarele tihlayeni ta mina; Wena u nzi nehele tshurini wa kufa.

¹⁶ Hakuva a timbyana ti nzi ranzele, A xidlemo xa vakubiha xi nzi ranzele; Va tlhavile a mandla ya mina ni mikonzo ya mina. Mar. 15:20; Lu. 23:33; Miti. 2:23

¹⁷ Nzi nga hlaya marambu ya mina wontihe; Vona va cuwuka va nzi honokela.

¹⁸ Va avana tinguwo ta mina, Va hlahluveta a bhaji ga mina. Mat. 27:35; Lu. 23:34; Joba 19:23

¹⁹ Kanilezi wena Jehova u ngave kule na mina, Wena ntamu wa mina, hatlisa u ta nzi vuna.

²⁰ Nzi hlangute supadwini, U ponisa wutomi ga mina ka timbyana.

²¹ Nzi hanyise kanwini wa nghala, Nzi tlhatlhise timhonzweni ta tinyari.

²² Nzi ta tlhatlhambutela vito ga wena ka vamakweru; Nzi ta ku dumisa xikari ka gotsovanyano. Maheb. 2:12

²³ Nwina lava mu chavako Jehova, mu dumiseni; Mu kuliseni nwina nwentlhe vana va Jakobe; Rurumelani ha yena, nwina nwentlhe varisanyana va Israeli.

²⁴ Hakuva a nga kanyisangi hambu ku nyenya a kuxaniseka ka loyi a xanisekako, Cima a nga mu fihlelangi a nghohe yakwe; Kanilezi i lo muzwa laha a nga mu rilela.

²⁵ Nzi ta ku dumisa gotsovanyweni wa hombe, Nzi ta tatisa zifungo za mina mahlweni ka lava va mu chavako.

²⁶ A va hlokisilweko va taga va xura, Lava va lavako Jehova va ta mu dumisa; A timbilu ta nwina a ti hanye kala kupinzuka. Isa. 65:13; Mat. 5:5

²⁷ Wontihe matlhelo ya misava ma ta alakanya Jehova, ma hunzuluka; Tixaka tontlhe ta vamatiko ti ta khizama mahlweni ka wena.

²⁸ Hakuva a mufumo ngwa Jehova; Hi yena mufumeli wa matiko wontihe. Obad. v. 21; Mika 5:2

²⁹ Vontlhe vahombe va misava va taga va mu khozela; Vontlhe lava va relelako xilahleni va ta mu koramela, Lava va nga zi kotiko ku ti hanyisa. 1 Sam. 2:8

³⁰ A vazukulu vabye va ta mu tirela; A xizukulwana leʼxi ta ngata xi ta byeliwa hi Hosi.

³¹ Va tata va ta tlhatlhambutela kululama kakwe, Va tivisa a mitiro yakwe a ka lixaka li ta nga belekiwa. Jer. 23:6