Tisimu 21 - Tshwa Bible

A lisimu la ku bonga.

Ka muchuli, Lisimu la Davida,

¹ Jehova, a ntamu wa wena wa tsakisa hosi; Wa tsaka nguvu hi kuhanyisa ka wena.

² U mu nyikile a kuxuva ka mbilu yakwe, A ku alangi a xikombelo xa nomu wakwe. (Sela.) Joh. 11:41; Maheb. 5:7

³ Hakuva u mu tlhangaveta hi zikatekiso zi nene; U mu ambexa a xidlodlo xa nzalama hlokweni yakwe.

⁴ I lo kombela wutomi, wena u mu nyika, A wutomi go leha, ga pinzukelwa. Tis. 61:6; Rom. 6:9

⁵ A wudzunzo gakwe ga hombe hi kota ya kuhlula ka wena; U mu nyikile wukosi ni wukulu.

⁶ U mu maha loyi a katekisilweko kala kupinzuka, U mu tsakisa mahlweni ka wena.

⁷ Hakuva hosi yi tsumba Jehova, Hi wuxinji ga loyi a Hunzeleleko Kutlakuka a nga ta tsekatsekiswa.

⁸ A canja ga wena gi ta kuma vontlhe a valala va wena, A canja ga wena ga xinene gi ta khoma laʼva ku vengako.

⁹ U ta va maha va vura khwatsi i phingo ga nzilo A sikwini ga zanga ya wena; Jehova i ta va khadamula zangeni yakwe, A nzilo wu ta va lovisa. Deut. 32:22; Jer. 17:4; Mal. 4:1

¹⁰ U ta lovisa a pswalo wabye laha misaveni, Ni lixaka labye li ta fuva xikari ka vanana va vanhu.

¹¹ Hakuva va ku xuvele kubiha, Va boha xikungo, kanilezi a va xi kotangi.

¹² Hakuva u ta va hlongolisa, U ta va phanda tinghoheni hi tigalala ta wena.

¹³ Jehova, ngha u kuliswa ntanwini wa wena: Hi ta yimbelela hi khesa a ntamu wa wena.