Tisimu 18 - Tshwa Bible

A ku khesa Jehova hi kota ya kutlhatlhiswa.

Lisimu la Davida a nanza ga Jehova, loyi a nga wula timhaka ta lisimu leli loku Jehova a mu tlhatlhisile mandleni ya valala vakwe, ni le mandleni ya Saule, aku:

¹ Nza ku ranza, Jehova, wena ntamu wa mina.

² Jehova hi ribye ga mina, ni khokhola ga mina, ni mutlhatlhisi wa mina; Nungungulu wa mina, ribye ga mina legi nzi chavelako ka gona; Xitlhangu xa mina, ni limhonzo la kuhanyiswa ka mina, ni khokhola ga mina. Lu. 1:69; Maheb. 2:13

³ Nza khongela ka Jehova, loyi a faneleko ku dumiswa; Zonake nzi ta tlhatlhiswa mandleni ya valala va mina.

⁴ A magota ya kufa ma wa nzi bohile, A mintalo ya zobiha yi nzi dzuxile.

⁵ A magota ya Xeole ma wa nzi bohile, Nzi wa khomekile minzhiyweni ya kufa.

⁶ Nzi lo khongela ka Jehova kuhlokisweni ka mina, Nzi rila ka Nungungulu wa mina; Yena i lozwa a gezu ga mina na a hi tempeleni yakwe, A huwa ya mina mahlweni kakwe yi lota enghena tindleveni takwe.

⁷ A misava yi lo tsekatseka yi rurumela; A ziseketelo za zitsunga zi lo ninginizwa, Zi jujiwa hakuva yena i wa zangarile.

⁸ Ku lo huma musi hi lomu tinhovini takwe, Hi nonwini wakwe ku lo huma nzilo wu lovisako, Ku lo huma kambe ni makhala ma vurako. Ekso. 19:18

⁹ I lo cikisa a matilo a relela; Ku wa phumile lahasi ka mikonzo yakwe.

¹⁰ I lo khilela a kerubima, a puruma, A haha tipapeni ta mheho.

¹¹ I lo tumbela munyameni, Wu maha tenda gakwe. Ku woneka mamati ya ntima ni marefu yo phuma.

¹² A marefu yakwe yo phuma malo suka kuhatimeni loku ku mu rangelako, Kuwa maralala ni makhala ya nzilo.

¹³ Jehova i lo dzinza le matilweni, Loyi a Hunzeleleko Kutlakuka i lo zwata gezu gakwe, Kuwa maralala ni makhala ya nzilo.

¹⁴ I phandile tigalala takwe, a va hangalasa, Zingwalangwanza zo tala zi va panzanya. 1 Sam. 7:10

¹⁵ A milonga ya mati yi lo woneka, Ziseketelo za misava zi sala kubaseni, Hi kota ya kupambula ka wena, Jehova, Hi kota ya xikuhe xa tinhovu ta wena.

¹⁶ I lo nawuluta woko na hi le hehla, a nzi khoma, A nzi humesa matini ya kueta.

¹⁷ I lo nzi hlanguta ka nala wa mina wantamu, Ni ka lava va nzi vengako, hakuva va lo nzi hlula. 1 Sam. 23:1

¹⁸ Va lo nzi putsuketa a siku nzi nga hi khombyeni, Kanilezi Jehova i wa hi xiseketelo xa mina.

¹⁹ I lo nzi yisa wutshanwini gi anamileko, I lo nzi hlanguta, hakuva i wa xalala ha mina.

²⁰ Jehova i lo nzi chachazela maringano ni kululama ka mina, Maringano ni kubasa ka mandla ya mina i lo nzi tlhelisela.

²¹ Hakuva nzi hlayisile a tindlela ta Jehova, A nzi onhangi nzi fularela a Nungungulu wa mina;

²² Zontlhe ziyimiso zakwe zi wa hi mahlweni ka mina, A nzi tsikangi milayo yakwe.

²³ Nzi wa nga hi na xisolo mahlweni kakwe, Nzi lo ti hlayisa lezaku nzi nga weli kugoheni. Deut. 18:13; 1 Tih. 13:3

²⁴ Hikwalaho Jehova i nzi chachazele kotisa kululama ka mina, Kota kubasa ka mandla ya mina kuwoneni kakwe.

²⁵ A wa wuxinji u ta mu mahela wuxinji; A wa kululama u ta mu mahela kululama.

²⁶ Ka wakubasa u woneka na u basile, Kanilezi a wakubiha wa tlheliselwa hi kubiha. Levi 26:23; Ezek. 7:27

²⁷ U ponisa a tiko gi hlokisilweko, Kanilezi u tsongahata a mahlo ya matshanza.

²⁸ U maha kandiya ya mina yi hatima, Jehova, Nungungulu wa mina, i nzi woningela munyameni wa mina.

²⁹ Loku nzi hi na wena nza zi kota ku hlula yimpi; Hi Nungungulu wa mina nzi tlula ligingisi.

³⁰ A ndlela ya Nungungulu yi mbhelele, A mhaka ya Jehova yi longamile; I xitlhangu ka vontlhe va mu tsumbako.

³¹ Himani Nungungulu loku ku nga hi Jehova? Himani a nga ribye a handle ka Nungungulu wa hina? Deut. 4:35; Isa. 43:11

³² Hi yena Nungungulu a nzi ambexako ntamu, A basisa a ndlela ya mina.

³³ Wa maha milenge ya mina yi fanana ni ya pswele ga hlangu, A nzi veka matshanwini ya mina ma tlakukileko.

³⁴ Wa gonzisa a mandla ya mina a kulwa, Kasi a mawoko ya mina ma zi kota ku kondla a wura ga suku.

³⁵ U nzi nyikile a xitlhangu xa kuhanyisa ka wena; A woko ga wena ga xinene gi nzi tiyisile, A wunene ga wena gi nzi kulisile.

³⁶ U anamisile a ndlela ya mikonzo ya mina, A mikonzo ya mina a yi retemukangi.

³⁷ Nzi lo hlongolisa valala va mina, nzi va kamanyeta, Cima a nzi na nga tlhela na nzi nga se nga va mbhetisa.

³⁸ Nzi va hlasele va kala va tsanzeka ni ku vuka, Va wile hasi mikonzweni ya mina.

³⁹ U nzi ambexile hi ntamu wa kuya yimpini; U nzi khozisele lava va nga nzi vukela.

⁴⁰ U nzi hlongolele a valala va mina, Nzi lovisa lava va nzi vengako.

⁴¹ Va loba huwa, kanilezi ku wa nga hi na mulweli, Va lo rila ka Jehova, kanilezi a nga va hlamulangi. Isa. 1:15; Joh. 9:31

⁴² Nzi lo va sila kukotisa tsutsungwani wu kukuletwako hi mheho, Nzi lo va cukumeta kota caka ga tindlela.

⁴³ U nzi tlhatlhisile timholoveni ta tiko, U nzi mahile a hloko ya vamatiko, A tiko legi nzi nga gi tiviko gi lo nzi tirela.

⁴⁴ Zalezo va ngazwa ha mina, va lo nzi ingisa, Ni vamatiko va lo ta khoza ka mina.

⁴⁵ A vamatiko va lo tsemeka mihlana, Va rurumela va huma lomu makhokholeni yabye.

⁴⁶ Jehova wa hanya! A gi dumiswe a ribye ga mina! Ngha a kuliswe a Nungungulu wa kuhanyiswa ka mina!

⁴⁷ Hi Nungungulu loyi a nzi photelako, Loyi a nzi khoziselako matiko.

⁴⁸ Wa nzi tlhatlhisa valaleni va mina; A nzi tlakusa hehla ka lava va nzi vukelako; Ni ku nzi hlanguta ka munhu wa lunya.

⁴⁹ Hikwalaho nzi ta ku bonga xikari ka matiko, Jehova, Nzi dumisa vito ga wena hi ku yimbelela. Rom. 15:9

⁵⁰ Wa nyika a hosi yakwe a kuhlula ka hombe, A kombisa tipswalo ka Davida, a totilweko wakwe, Ni ka lixaka lakwe kala kupinzuka. 2 Sam. 7:8