Tisimu 17 - Tshwa Bible

A wuchavelo ga loyi a nga hiko na nanzu.

Mukombelo wa Davida.

¹ Jehova, zwana a mhaka yi lulamileko, Ingisa a huwa ya mina; Riya ndleve ka mukombelo wa mina, a wu humi nonwini wa kuxengetela.

² A kulamulwa ka mina a kute hi ka wena; A mahlo ya wena ngha ma cuwuke a nongameto.

³ U hlolile a mbilu ya mina, u yi hlolisisa ni wusiku; U nzi hlolile, kanilezi a ku kumangi nanzu; A maalakanyo yo biha a ma humi nonwini wa mina.

⁴ Xungetano ni mitiro ya vanhu, hi kota ya mhaka ya wena Nzi ti hlayisele tindleleni ta zigevenga.

⁵ Nzi namarele tindleleni ta wena, A mikonzo ya mina a yi retemuki. Joba 23:11; Tis. 18:36

⁶ Nza khongela ka wena, Nungungulu, hakuva u ta nzi hlamula; Dembela ndleve ka mina, uzwa kuwulawula ka mina.

⁷ Kombisa wuxinji ga wena gi hlamalisako, Wena loyi u ponisako lava va ku tsumbako; U va lwela ka valala vabye hi woko ga wena ga xinene.

⁸ Nzi hlayise ku khwatsi i nzololoya tihlo, U nzi fihla nzhutini wa tipapa ta wena,

⁹ A ka vakubiha lava va nzi vukelako, Ni ka valala va mina vo leva, lava va nzi ranzelako.

¹⁰ Va nonohisa a timbilu tabye, Va wulawula matshanza hi milomu yabye.

¹¹ Va hi ranzele laha hi fambako kona, Va hi swola kasi ku hi wisa lahasi.

¹² I kotisa nghala leyi yi nga ni matloti pfimbeni wa yona, Ni xinghalana xi xiyelelako wutshanwini ga xihundla.

¹³ Vuka, Jehova, u mu tlhangaveta, u mu wisa lahasi, Lwela muhefemulo wa mina hi supado ya wena ka loye wo biha.

¹⁴ Nzi tlhatlhise ka vanhu va misava hi canja ga wena, Jehova, Lava va nga ni xiavelo xabye kuhanyeni loku; Lava u xurisileko hi tshomba ya wena: Va na ni vanana vo tala, Va siyela misalelwa ka vazukulu vabye. Lu. 16:25; Fil. 3:19

¹⁵ A kululameni ka mina nzi ta wona a nghohe ya wena, Loku nzi khindlimuka nzi ta eneliswa hi dzumba ga wena. Mat. 5:8; Joh. 17:24; 1 Kor. 13:12