Tisimu 147 - Tshwa Bible

A khesiwe Jehova loyi a vuxako Zioni.

¹ Dumisani Jehova! Hakuva zi nene ku dumisa Nungungulu wa hina; Zi sasekile, i fanekele ku dumisiwa.

² Jehova wa vuxa Jerusalema, Wa tsombanyisa lava va hangalisilweko va Israeli. Deut. 30:4; Isa. 11:12

³ Wa tangalisa lava va timbilu ti tshovekileko, A bohelela timbanga tabye.

⁴ Wa hlaya a ntsengo wa tinyeleti, Wa ti vitana hi mavito ya tona.

⁵ A Hosi ya hina nja hombe, yi na ni ntamu wa hombe; A wutlhari ga yona a gi na lipimo. Rom. 11:33

⁶ Jehova wa lonzowota lava va koramileko, A vakubiha va hoxiwa lahasi. Lu. 1:52

⁷ Yimbelelani Jehova zinwe ni kubonga, Yimbelelani Nungungulu wa hina hi xitende.

⁸ Loyi a fenengetako a tilo hi marefu, A nisako vula misaveni, Ni ku milisa byanyi lomu zitsungeni. Miti. 14:17

⁹ Loyi a nyikako zihari a kuga ka zona, A gisa mavinyani ya zikunguwa loku ma rila. Joba 38:41; Lu. 12:24

¹⁰ A nga tsakeli a ntamu wa haxi, Hambu ku tsakiswa hi kutsutsuma ka munhu.

¹¹ Jehova wa xalaliswa hi lava va mu chavako, Lava va tsumbako wuxinji gakwe.

¹² Jerusalema, dumisa Jehova, Zioni, dzumeleta Nungungulu wa wena.

¹³ Hakuva i tiyisile a zikwinyaro za tinyangwa ta wena, I katekisile a vana va wena va nga xikari ka wena.

¹⁴ I vanga kurula mimbhinganweni ya wena, Wa ku xurisa hi mavele ma nene.

¹⁵ Wa rumela zilayelo zakwe laha misaveni, A mhaka yakwe yi tsutsuma mazambo.

¹⁶ Wa nisa gapongo khwatsi i woya ga tiyivu, Wa hangalasa mbhera khwatsi i khuma.

¹⁷ Wa wisa a maralala yakwe khwatsi i matlhatlha, Himani a xi tiyelako a xirami xakwe?

¹⁸ A ruma gezu gakwe, zi nyunguluka; Wa maha mheho yakwe yi pupuxa, a mati ma khulunga.

¹⁹ Wa hlawutela mhaka yakwe ka Jakobe, Ni milayo yakwe ni zileletelo zakwe ka Israeli. Deut. 33:4

²⁰ A nga mahangi lezo ka manwani matiko, A zileletelo zakwe a ma zi tivi. Dumisani Jehova!