Tisimu 146 - Tshwa Bible

Jehova wa ranza lava va lulamileko.

¹ Dumisani Jehova! Muhefemulo wa mina, dumisa Jehova.

² Laha na nza ha hanya, nzi ta dumisa Jehova; Nzi ta yimbelela Nungungulu loku nza ha hi kona.

³ Mu nga tsumbi tihosi, Hambu a nʼwana wa munhu, loyi a nga zi kotiko ku ponisa. Jer. 17:5

⁴ Loku wu huma moya wakwe, a tlhelela ntshurini; Ku mbhela makungu yakwe hi gwalego siku. Gen. 3:19; Mutsha. 12:7

⁵ I katekile loyi Nungungulu wa Jakobe a nga muvuni wakwe, Loyi a tsumbako Jehova, Nungungulu wakwe,

⁶ Loyi a nga maha tilo ni misava, Ni bimbi ni zontlhe zi nga ka zona; Loyi a tsumbekako kala kupinzuka. Miti. 14:15; Kuv. 14:7

⁷ Loyi a lamulelako lava va tsimbeketilweko, Loyi a gisako lava va nga ni ndlala. Jehova Wa tlhatlhisa lava va nga makhotsweni.

⁸ Jehova wa vulula mahlo ya zikhumu, Jehova wa ololoxa lava va koramileko, Jehova wa ranza lava va lulamileko. Isa. 35:5; Mat. 11:5

⁹ Jehova wa lonzowota a vamatiko, Wa hlayisa a zisiwana ni tinoni; Kanilezi i hambanyisa a tindlela ta vakubiha. Deut. 10:18

¹⁰ Jehova i ta fuma kala kupinzuka, I Nungungulu wa wena, Zioni, ka zizukulwana zontlhe. Dumisani Jehova!