Tisimu 143 - Tshwa Bible

Nzi gonzise ku maha kuranza ka wena.

Lisimu la Davida.

¹ Jehova, zwana mukombelo wa mina, Kangatela ndleve ka mikombelo ya mina. Nzi hlamule hi kutsumbeka ka wena ni kululama ka wena.

² U nga engheni kulamuleni ni na nza ga wena, Hakuva xikari ka lava va hanyako A ku na munhu a ta nga kumiwa na lulamile mahlweni ka wena. Rom. 3:20; Gal. 2:16

³ Hakuva a nala wa hlokisa muhefemulo wa mina, I kanzihele wutomi ga mina lahasi; I nzi susumetele munyameni kukotisa lava va fileko kale.

⁴ A moya wa mina wu na ni gome nzeni ka mina, A mbilu ya mina ya xaniseka xifuveni xa mina.

⁵ Nza alakanya masiku ya kaleloko, Nzi ehleketa hi zimaho za wena zontlhe, Nzi ehleketa mitiro ya mandla ya wena.

⁶ Nza tlakusa mandla ya mina ka wena, A muhefemulo wa mina wu na ni tora ha wena kukotisa misava yi omileko. (Sela.)

⁷ Jehova, hatlisa u nzi hlamula, A moya wa mina wa mbhela ntamu; U nga nzi fihleli nghohe ya wena, Kasi nzi nga fani ni lava va relelako nkeleni.

⁸ Nzi mahe nzizwa wuxinji ga wena laha mixweni, Hakuva nzi tsumba ka wena; Nzi tivise a ndlela leyi nzi faneleko ku famba ha yona, Hakuva nza tlakusa muhefemulo wa mina ka wena.

⁹ Jehova, nzi ponise ka valala va mina; Nza chavela ka wena.

¹⁰ Nzi gonzise ku maha kuranza ka wena, Hakuva u Nungungulu wa mina; A moya wa wena loʼwu nene, a wu nzi fambise tikweni ga ku lulama.

¹¹ Jehova, nzi hanyise hi kota ya vito ga wena, Humesa muhefemulo wa mina khombyeni hi kululama ka wena.

¹² Hi wuxinji ga wena mbhetisa valala va mina, U lovisa vontlhe tava va hlokisako muhefemulo wa mina, Hakuva nzi nanza ga wena.