Tisimu 142 - Tshwa Bible

Wena u wuchavelo ga mina.

Maxili ya Davida; Mukombelo laha a nga hi lomu muhumeni.

¹ Nza rila ka Jehova hi gezu ga mina, Hi gezu ga mina nzi khongela ka Jehova.

² Nzi chulula kuvilela ka mina mahlweni kakwe, Nzi mu bikela hlomulo wa mina.

³ Laha a moya wa mina wu nga ni gome nzeni ka mina, Hi wena loyi u tivako ndlela ya mina. Va vekile ziyo laha ndleleni nzi fambako ha yona.

⁴ Cuwuka reveni ga mina ga xinene u wona lezaku a ku na loyi a nzi tivako. A ku na laha nzi nga chavelako kona, Ku hava munhu a khatalelako muhefemulo wa mina.

⁵ Jehova, nza rila ka wena, Nziku: Wena u wuchavelo ga mina, U xiavelo xa mina laha misaveni ya vahanyako.

⁶ Ingisa kurila ka mina, Hakuva nzi le hlomulweni wa hombe; Nzi ponise ka vaxanisi va mina, Hakuva va nzi hunza hi ntamu.

⁷ Humesa muhefemulo wa mina lomu paxweni, Kasi nza dumisa vito ga wena. A vakululama va ta nzi ranzela, Laha u ta nga nzi mahela tipswalo.