Tisimu 139 - Tshwa Bible

Jehova wena wa nzi tiva.

Ka muchuli. Lisimu la Davida.

¹ Jehova, u nzi hlotile, wa nzi tiva.

² Wa tiva kutshama ka mina ni kusuka ka mina; U tiva maalakanyo ya mina na u hi kule. Mat. 9:4

³ U hlola kufamba ka mina ni kuetlela ka mina, U tiva tindlela ta mina tontlhe. Maheb. 4:13

⁴ Hakuva a gezu na gi nga seva lirimini la mina, Jehova kale na u gi tivile.

⁵ Wena wa nzi divela le mahlweni ni lenzhako, U tlhatekile canja ga wena hehla ka mina.

⁶ A kutiva ka kunghahi ka nzi hlamalisa, Ku tlakukile, a nzi zi koti ku ku pima.

⁷ Nzi ngaya kwihi kasi kuva kule ni moya wa wena, Nzi nga tsutsumela kwihi kasi kuva kule ni nghohe ya wena ke?

⁸ Loku nzi kanziha tilweni, laho u kona, Ni loku nzi etlela Xeole, u kona lomo kambe. Joba 22:12; 26:6; Am. 9:2

⁹ Loku nzi kanziha hi tipapa ta wuronga, Nzi ya aka le magumo ya bimbi,

¹⁰ Na kona a canja ga wena gi ta nzi rangela, Ni canja ga wena ga xinene gi ta nzi khoma.

¹¹ Loku nziku: A munyama a wu nzi fihle, Ni kuwonekela a kuve wusiku laha nzi nga kona;

¹² A ka wena a munyama a wu phumi, A wusiku gica kukotisa hlikanhi; A ka wena a munyama ni kuwonekela zi ringene. Jak. 1:17

¹³ Hi wena u mahileko a tiswa ta mina, U lo nzi wumba rumbyini ga mamani.

¹⁴ Nza ku dumisa hi kota ya ku nzi wumba ka wena ku rewukisako, A mitiro ya wena yi hlamalisa. A muhefemulo wa mina wa zi tiva khwatsi.

¹⁵ A marambu ya mina a ma ku fihlalelangi, Laha nzi nga wumbiwa xihundleni, Nzi mahiwa hi wutlhari kueteni ka misava.

¹⁶ A mahlo ya wena ma nzi wonile na nza ha wumbiwa, Ni masiku ya mina wontihe ma lo tsaliwa bhukwini ga wena, Ma hlayilwe na ma nga se kuva kona.

¹⁷ Nungungulu, a maalakanyo ya wena lisima ka mina, Wu kulisile kuyini a ntsengo wa wona!

¹⁸ Loku nzi wa ta ma hlaya, ma hunza kutala ka seke; Ni loku nzi khindlimuka nza hi na wena.

¹⁹ Nungungulu, kunene u ta daya a vakubiha; Hikwalaho sukani ka mina, nwina vanhu va nkhata!

²⁰ Hakuva va wulawula kubiha ha wena, A valala va wena va hemba mawunwa hi vito ga wena.

²¹ Jehova, a nzi va vengi lava va ku vengako ke? A nzi swihalangi hi lava va ku vukelako ke?

²² Nzi va venga hi livengo la ntamu, Nzi va hlaya kota valala va mina.

²³ Nungungulu, nzi hlole, u tiva mbilu ya mina; Nzi ringe, u tiva a maalakanyo ya mina.

²⁴ U cuwuka loku nzi kari nzi famba hi ndlela ya kubiha, U nzi rangela ndleleni ya pinzukelwa.