Tisimu 138 - Tshwa Bible

Jehova wa khatalela lava va koramileko.

Lisimu la Davida.

¹ Nzi ta ku bonga hi mbilu ya mina yontlhe; Nzi ta yimbelela kudumisa ka wena mahlweni ka vanungungulu.

² Nzi ta ku khizamela tempeleni ya wena yo basa, Nzi dumisa a vito ga wena hi kota ya wuxinji ga wena ni zinene za wena, Hakuva u engetele a wudumo ga wena hi ku tatisa a zitsumhiso za wena. 2 Sam. 7:21

³ A siku legi nzi nga rila, u nzi hlamule; U nzi tiyisile, a muhefemulo wa mina wu kuma ntamu.

⁴ Tontlhe tihosi ta misava ti ta ku bonga, Jehova, Loku tizwa a timhaka ta nomu wa wena.

⁵ Ti ta khesa a tindlela ta Jehova, Hakuva a wudzunzo ga Jehova ga hombe.

⁶ Hambu lezi Jehova a tlakukileko, wa khatalela lava va koramileko; Wa tiva a vamatshanza na va hi kule. Lu. 1:48, 52; 14:11

⁷ Hambu nzi famba xikari ka zikarato, wena wa nzi hanyisa; U nawuluta canja ga wena u nzi vikela ka zanga ya valala va mina, A canja ga wena ga xinene ga nzi ponisa.

⁸ Jehova i ta hetisa a ntiro wakwe a nzi tirelako wona. Jehova, a wuxinji ga wena ga kala kupinzuka; U nga tsiki a mitiro ya mandla ya wena.